Reagimi i Behgjet Pacollit për çështjen e Aeroportit të Vlorës ngre një pyetje të madhe për çdo qytetar shqiptar: pse duhet të paguajë taksapaguesi një faturë që mund të shkojë në qindra milionë euro për një konflikt që lidhet me një koncesion dhe me mosmarrëveshje mes palëve private?
Dy ortakë rrihen me njëri-tjetrin dhe nuk e zbatojnë kontratën me shtetin shqiptar, ndërsa faturën duhet ta paguajë shteti shqiptar!?
Ja reagimi i plotë i Pacollit:
Sot Ministria e Infrastrukturës dhe Energjisë ka nisur procedurën për zgjidhjen e Kontratës së Koncesionit të Aeroportit Ndërkombëtar të Vlorës. Deri në këtë moment, MABCO Constructions SA nuk ka marrë asnjë njoftim zyrtar nga Autoriteti Kontraktor. Për një investim strategjik me rëndësi kombëtare, është e papranueshme që investitori të informohet nga mediat dhe jo nga institucionet shtetërore.
Nëse ky lajm rezulton i vërtetë, atëherë shteti shqiptar po zgjedh me vetëdije rrugën e arbitrazhit ndërkombëtar. MABCO ka bërë çdo përpjekje për ta shmangur këtë skenar dhe për të gjetur një zgjidhje institucionale. Fatkeqësisht, përballë papërgjegjshmërisë, heshtjes dhe veprimeve të paligjshme të disa përfaqësuesve shtetërorë, çdo mundësi për zgjidhje është mbyllur .
Ky arbitrazh do të jetë pasojë e drejtpërdrejtë e neglizhencës, veprimeve të kundërligjshme dhe papërgjegjshmërisë së disa përfaqësuesve të institucioneve shtetërore, e veprimeve të elementëve që, nën mbulesën e institucioneve, kanë vepruar jashtë ligjit, si dhe e dështimit të një sistemi drejtësie të ndikuar për të garantuar zbatimin e ligjit dhe mbrojtjen e të drejtave të investitorit.
Nuk kam dëshiruar kurrë që taksapaguesit shqiptarë të paguajnë faturën e neglizhencës, papërgjegjshmërisë dhe vendimeve të paligjshme të zyrtarëve që sot vazhdojnë të sillen me indiferencë, sepse ata nuk mbajnë asnjë përgjegjësi personale. Dëmin nuk e paguajnë ata, por qytetarët shqiptarë dhe biznesi.
MABCO është ekspozuar financiarisht me mbi 320 milionë euro, pa përfshirë humbjen e fitimit dhe kostot ligjore. Kompania kishte përfunduar pothuajse të gjitha detyrimet kontraktore dhe ndodhej vetëm pak para fazës së certifikimit të aeroportit.
Megjithatë, pas vendimit të Gjykatës së Lartë, grupe që veprojnë në mënyrë arbitrare dhe jashtë ligjit, me mbështetje ose tolerim institucional, penguan MABCO-n të hynte në kantier dhe të përfundonte projektin. Për muaj të tërë, në prani të Policisë së Shtetit, investitori u mbajt jashtë pronës së tij, ndërsa pajisje me vlerë u dëmtuan, u shkatërruan dhe një pjesë edhe u vodhën.
Paradoksi është i qartë: nga njëra anë institucionet penguan përfundimin e projektit, ndërsa nga ana tjetër kërkojnë ta përdorin këtë pengesë si arsye për zgjidhjen e kontratës.
Kjo bie ndesh me vendimin e Gjykatës së Lartë, me Kontratën e Koncesionit, me Marrëveshjen Dypalëshe për Mbrojtjen e Investimeve ndërmjet Zvicrës dhe Shqipërisë dhe me parimin universal të së drejtës se askush nuk mund të përfitojë nga sjellja e vet e paligjshme.
Nëse procedura konfirmohet, MABCO do të mbrojë të drejtat e saj me të gjitha mjetet juridike, përfshirë provat dhe faktet qe posedon kundër secilit qe ka shkaktuar këtë skandal të turpshëm e deri të ARBITRAZHI tregtar ndërkombëtar kundër Republikës së Shqipërisë.
Ky nuk është një kërcënim. Është pasoja juridike e veprimeve joligjore dhe mosveprimeve të papërgjegjshme të përfaqësuesve të institucioneve shtetërore.
Këtë postim ka bërë Behgjet Pacolli.
Shteti shqiptar ka dhënë një koncesion për ndërtimin dhe funksionimin e një aeroporti strategjik. Një kontratë e tillë nuk është një premtim politik, por një marrëveshje me detyrime konkrete. Kush merr përsipër një projekt të tillë duhet ta dorëzojë në kohë dhe sipas kushteve të përcaktuara. Nëse brenda një kompanie ka pasur konflikte, përplasje apo probleme mes ortakëve, ato nuk mund të kthehen në një barrë financiare për qytetarët shqiptarë.
Sigurisht, nëse shteti ka shkelur kontratën, kjo duhet të provohet dhe drejtësia duhet të vendosë. Por edhe investitori duhet të mbajë përgjegjësi për angazhimet që ka marrë. Nuk mund të jetë gjithmonë qytetari ai që paguan kur projekte të mëdha dështojnë ose përfundojnë në përplasje ligjore.
Nëse MABCO vendos ta çojë çështjen në arbitrazh ndërkombëtar, ajo është rruga ligjore që ekziston dhe vendimin duhet ta japë drejtësia. Por shteti shqiptar duhet të mbrojë interesin e tij dhe të mos lejojë që një konflikt biznesi të kthehet në një faturë për popullin shqiptar.
Sa i përket shtetësisë shqiptare të Behgjet Pacollit, kjo është një çështje që duhet parë me seriozitet nga institucionet. Behgjet Pacolli, si nënshtetas kosovar, ka marrë edhe nënshtetësinë e Shqipërisë, me të cilën lëviz pa viza kudo në botë. Pra, me këtë pasaportë shqiptare ai do ta padisë shtetin shqiptar për qindra milionë euro. Me këtë pasaportë do të firmosë dhe do të udhëtojë për ta paditur shtetin shqiptar.
Shtetësia nuk është vetëm një privilegj, por edhe një lidhje besimi dhe përgjegjësie me Republikën e Shqipërisë. Nëse një person përfiton nga kjo lidhje dhe më pas hyn në një konflikt të rëndë me interesat ekonomike të shtetit, atëherë institucionet duhet të shqyrtojnë çdo mundësi që parashikon ligji, përfshirë edhe çështjen e shtetësisë shqiptare. Disa burime tregojnë se po e shqyrtojnë këtë mundësi ligjore e kushtetuese…
Në fund, Shqipëria duhet të dërgojë një mesazh të qartë: investimet janë të mirëpritura, por kontratat duhet të respektohen. Asnjë individ, kompani apo grup interesi nuk mund të jetë mbi interesin publik. Qytetarët shqiptarë nuk duhet të paguajnë për gabimet, konfliktet apo dështimet e të tjerëve.
Kjo që ndodhi në Aeroportin e Vlorës me dy kosovarë që shkatërruan projektin dhe lanë nam, duhet të jetë një mësim i madh për shtetin shqiptar!