Sekretari i Përgjithshëm i Partisë së Lirisë, Tedi Blushi thotë se ata si parti kanë qenë nën një agresion terrorist nga qeveria Rama. Në takimin e thirrur nga Berisha në selinë blu me aleatët e federatës së bashkuar opozitare, Blushi shtoi se sondazhet e publikuara, të cilat nxjerrin një rezultat jo të mirë për opozitën, janë të paguara nga qeveria dhe të pavërteta.
Fjala e Blushit
Rrëmbimi kriminal, i paligjshëm, izolimi në ekstrem pa fakta dhe pa prova penale i Presidentit të Partisë së Lirisë, Ilir Meta në fakt është paralajmërim për lirinë e çdo shqiptari, i cili vetëm i lirë nuk ndihet në Atdheun e tij. Sa ju përket sondazheve që dhe kolegu i përmendi më parë, unë jam i bindur se me to qeshin edhe vet porositësit e tyre. Këto sondazhe do të groposen më 11 Maj në landfilldin e Sharrës.
Porositësit e tyre nuk janë askush tjetër veçse mafia e inceneratorëve që ka kapur shumicën e mediave në vend. E rëndësishme është dhe duhet të bëjmë çdo përpjekje që opozita të jetë e bashkuar, në front kundër Narkoregjimit, në mbrojtje të lirive dhe të drejtave të të gjithë shqiptarëve. I ftoj të gjithë shqiptarët e ndershëm dhe patriotë të marrin pjesë në protestën e thirrur nesër, më 8 shkurt. Kjo protestë që në radhë të parë thirret në mbrojtje të të drejtave dhe lirive të çdo shqiptari.
Për të mbrojtur atdheun e tyre nga ajo që me shumë të drejtë ne e kemi cilësuar si një organizatë mafioze sorosiane, e cila nuk mund të marrë më peng të ardhmen e vendit dhe që qëndron në pushtet edhe falë një tjetër strukture po aq kriminale si SPAK. Nëpërmjet goditjes së liderve kryesorë të opozitës, nëpërmjet shantazhimit të drejtuesve të saj, për t’i garantuar Ramës edhe një mandat tjetër 4-vjeçar në kurriz të shqiptarëve.