Ka nisur në Tiranë Samiti i IV i Diasporës, i cili po zhvillohet në datat 13, 14 dhe 15 prill, duke mbledhur shqiptarë nga e gjithë bota në një platformë të përbashkët bashkëpunimi. Dita e parë e samitit u shënua dje me aktivitetet hapëse dhe pjesëmarrje të gjerë nga përfaqësues të diasporës dhe institucioneve.
Ndërsa sot, punimet vijojnë në Pallati i Kongreseve me panele tematike të fokusuara në zhvillimin ekonomik, inovacionin dhe rolin e diasporës në të ardhmen e vendit.
Një nga panelet kryesore është “Diaspora, partner në biznes dhe inovacion”, ku merr pjesë edhe Agjencia Shqiptare e Zhvillimit të Investimeve (AIDA). Në këtë panel, Drejtoresha e Përgjithshme e AIDA-s, Laura Saro, theksoi se :Shqipëria është pjesë e një gare rajonale për tërheqjen e investimeve të huaja, ku vendet e Ballkanit po aplikojnë politika gjithnjë e më konkurruese, nga lehtësitë fiskale te subvencionet.
Në një kohë kur vendet e rajonit konkurrojnë për tërheqjen e investimeve të huaja përmes politikave lehtësuese, Shqipëria po pozicionohet gjithnjë e më fort si një destinacion me potencial. Diaspora shqiptare përfaqëson një aset të çmuar – jo vetëm si investitorë, por edhe si bartës të ekspertizës, partnerë strategjikë dhe ura lidhëse me tregjet ndërkombëtare.
Synimi është i qartë: ndërtimi i një ekosistemi dinamik që rrit konkurrueshmërinë e Shqipërisë dhe fuqizon rolin e diasporës në zhvillimin e qëndrueshëm ekonomik. Në përfundim, ajo nënvizoi se qëllimi është krijimi i ekosistemeve të integruara që ofrojnë mundësi konkrete bashkëpunimi dhe një paketë konkurruese për investitorët, duke maksimizuar kontributin e diasporës në zhvillimin ekonomik të vendit.
Gjatë aktivitetit, Drejtoresha e AIDA-s zhvilloi gjithashtu një sërë takimesh me përfaqësues të bizneseve të diasporës, të cilët kanë shprehur interes konkret për të investuar në Shqipëri, duke e kthyer samitin në një hapësirë reale bashkëpunimi dhe mundësish ekonomike.
