Policia ka dhënë detajet e para për 38-vjeçarin e identifikuar si Çlirim Zekthi, i cili ishte në gjendje të dehur mbrëmjen e kaluar dhe u hodhi lëndë djegëse fqinjëve të tij. Pas një konflikti për motive të dobëta, nuk hezitoi që t’i shkaktonte dëme, ndërsa të lënduarit janë jashtë rrezikut për jetën.
Njoftimi i policisë: Specialistët për Hetimin e Krimit në Komisariatin e Policisë Elbasan kanë arrestuar në flagrancë shtetasin Ç. Z., 38 vjeç, banues në Elbasan.
Në lagjen “Shënkoll”, Elbasan, gjatë një konflikti për motive të dobëta, shtetasi Ç.Z dyshohet nën efektin e alkoolit, u ka hedhur në trup lëndë djegëse duke u shkaktuar dëmtime fqinjëve të tij shtetasve S. Sh. dhe K. Sh, të cilët ndodhen jashtë rrezikut për jetën.
Personi që arriti të shmangë ngjarjen foli para mediave mbrëmjen e kaluar dhe rrëfeu se gjithçka nisi nga fqinji, i cili ishte i alkoolizuar dhe shau komshien. Më pas i hodhi benzinën dhe i shkaktoi djegie në trup. Para mediave, ‘shpëtimtari’ thotë se të gjithë zonën e ka zënë belaja me Çlirim Zekthi.
“I vuni shkrepësen asaj. Ajo gruaja u dogj komplet. Mora disa peshqira të lagur që kisha aty dhe ja hodha në kokë, e fika në moment. Unë i dhashë ndihmën e parë. E shau ai çuni, gruaja u fut brenda por i vuri bidonin e benzinës në kokë. Djali u dogj nga veshi. Ai ishte budalla, merr policia e mban 2 orë, e nxjerr prap. Kemi gjetur belanë me të”, tha ai.
Ende nuk janë të qarta motivet e konfliktit, ndërsa në vendngajrje dukeshin shenjat e zjarrit në murin e shtëpisë. Zënka ka ndodhur ne ambientet e jashtme të ndërtesave të cilat ndodhen ngjitur mes tyre.