Gjykata e Tiranës ka caktuar masën e sigurisë “arrest me burg” për Agron Tanushin, i cili u arrestua për vrasjen e kunatës, Jetmira Hasani, ngjarje kjo e ndodhur dy ditë më parë në zonën e Bathores në Tiranë.
Në gjykatë Tanushi ka pranuar krimin për shkak të konflikteve për çështje pronësie që herët, por atë ditë sipas tij i kanë ardhur disa të rinj në shtëpi, të cilët e kanë kërcënuar. Tanushi është vetëdorëzuar me vullnet të lirë në komisariat, pasi kishte tentuar fillimisht të fshihej në qytetin e Lushnjes.
E gjithë skena e vrasjes është kapur nga kamerat e sigurisë pasi banesa ka qenë e survejuar.
Tanushi dhe Hasani kanë pasur përplasje të vazhdueshme mes tyre, pasi 34-vjeçarja qendronte në një shtëpi me familjen e ish-bashkëshortit të saj, i cili nga ana e tij prej vitesh ndodhej në emigracion.
Në ditën kur ndodhi vrasja në banesën e autorit dhe viktimës ka qenë dhe Policia, dhe është larguar vetëm pak minuta se të ndodhte krimi i rëndë.