Vrasja e 14-vjeçarit Martin Cani, nxorri në pah të rinjtë problematikë që përhapin gjuhën e dhunës në TikTok. Policia e Shtetit ka çuar për ndjekje në prokurori 16-vjeçarin i cili nxit urrejtje dhe sherr përmes rrjeteve sociale. 16-vjeçari me banim në SHBA nëpërmjet rrjeteve sociale, ka bërë thirrje për nxitje të grindjeve, për mbajtje të armëve të ftohta nga fëmijët dhe për përdorimin e tyre në konflikte.
Njoftimi i plotë
Specialistët e Sektorit për Hetimin e Krimeve Kibernetike të DVP Tiranë, menjëherë pas publikimit të pamjeve filmike, kanë identifikuar shtetasin 16 vjeç që shfaqet në video, i cili banon në SHBA.
Në vijim të veprimeve për rastin, janë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për fillimin e procedimit penal, për 16-vjeçarin.
Ky shtetas, nëpërmjet rrjeteve sociale, ka bërë thirrje për nxitje të urrejtjes ose grindjeve, për mbajtje të armëve të ftohta nga fëmijët dhe për përdorimin e tyre në konflikte. Materialet procedurale i kaluan Prokurorisë, për veprën penale “Nxitja e urrejtjes ose grindjeve”, parashikuar nga neni 265 i Kodit Penal.