Zona e Drenovës në Mallakastër po përballet prej më shumë se 24 orësh me një situatë kritike për shkak të zjarreve që kanë përfshirë një sipërfaqe të konsiderueshme me kullota, pyje dhe ullishte. Tre vatra të fuqishme zjarri janë aktive që nga dita e diel dhe janë riaktivizuar disa herë si pasojë e terrenit të vështirë dhe erës së fortë, që po favorizon përhapjen e flakëve.
Pavarësisht përpjekjeve të pandërprera nga forcat zjarrfikëse për të mbajtur situatën nën kontroll, ndërhyrja nga toka ka rezultuar e pamjaftueshme. Pasditen e së hënës është realizuar një ndërhyrje nga ajri, e konsideruar si mundësia e vetme efektive për shuarjen e zjarreve që po kërcënojnë edhe banesa në zonë.
Autoritetet janë në gatishmëri dhe vijojnë monitorimin e situatës, ndërsa apelojnë për kujdes dhe bashkëpunim nga banorët lokalë për të shmangur çdo veprim që mund të rrezikojë përhapje të mëtejshme të flakëve.