Ulja e numrit të të prekurve nga koronavirusi që nga dita enjte ka bërë që zyrtarët e 6 provincave në Kinë të ulin nivelin e alarmit nga 1 që është maksimali, në 2 ose 3. Bëhet fjalë për provincat Gansu, Liaoning, Guizhou, Yunnan, Shanxi e Guangdong.
Kjo lëvizje e autoriteteve lokale vjen pas ftesës së bërë nga presidenti Xi Jinping për rikthim në normalitet të aktiviteteve pas pushimeve të vitit të ri kinez që zgjatën më shumë këtë vit për shkak të përhapjes së virusit vdekjeprurës.
Një zhvillim tjetër i rëndësishëm në Kinë është dhe ai që autoritetet në Wuhan do lejojnë personat që nuk janë rezidentë të kthehen në qytetet e tyre nëse nuk shfaqin simptomat e sëmundjes. Me këtë vendim të zyrtarëve të Wuhanit largohet bllokimi total që ishte vendosur për të ndaluar përhapjen e epidemisë.
