Mbreti Charles dhe mbretëresha Kamila e Britanisë së Madhe, do të mbërrijnë sot në Amerikë për një vizitë 4 ditore. Ky udhëtim ka marrë edhe më shumë rëndësi pas të shtënave gjatë darkës së gazetarëve të Shtëpisë së Bardhë dhe në një kohë tensionesh mes aleatëve të ngushtë.
Vizita deri tani më e rëndësishmja dhe me profilin më të lartë gjatë fronit të Charles-it, shënon 250-vjetorin e shpalljes së pavarësisë së Shteteve të Bashkuara nga sundimi britanik dhe është e para e një monarku britanik në këtë vend pas dy dekadash.
Ajo nis me një takim privat me presidentin Trump, përfshin një fjalim në Kongres si dhe një darkë madhështore në Shtëpinë e Bardhë. Donald Trump ka deklaruar se Mbreti Charles do të jetë shumë i sigurt gjatë vizitës. Presidenti amerikan tha se ambientet e Shtëpisë së Bardhë që do të vizitojë Mbreti Charles, janë vërtet të sigurta.
