Ministri i Jashtëm gjerman, Johann Wadephul, nis sot një tur në gjashtë vendet e Ballkanit Perëndimor, duke filluar me një vizitë në Bosnjë e Hercegovinë.
Qëllimi kryesor i turit është procesi afatgjatë i anëtarësimit në BE të shteteve të Ballkanit Perëndimor, i cili për disa prej tyre ka zgjatur prej dekadash.
Një zëdhënës i Ministrisë së Jashtme gjermane tha se Gjermania ka qenë prej kohësh një partnere e ngushtë e rajonit në rrugën drejt Bashkimit Europian.
“Për ne një gjë është e sigurt: Ballkani Perëndimor është pjesë e familjes evropiane”, u shpreh ai.
Në vitin 2003, Bashkimi Europian vendosi që vendet e Ballkanit Perëndimor do të ishin të pranueshme për anëtarësim, pasi të përmbushnin një sërë reformash. Sot, shtetet ndodhen në faza të ndryshme të këtij procesi, ndërsa frustrimi për zgjatjen e tij vazhdon të rritet. BE-ja ka frikë se kjo mund t’i shtyjë disa vende të afrohen më shumë me rivalë politikë si Kina dhe Rusia.
Wadephul pritet të takohet me tre anëtarët e Presidencës së Bosnjë e Hercegovinës, përfaqësuesit boshnjak, serb dhe kroat në Sarajevë. Ai do të zhvillojë gjithashtu një takim me Christian Schmidt, përfaqësuesin e lartë ndërkombëtar për Bosnjë e Hercegovinën, sipas Marrëveshjes së Paqes së Dejtonit, e cila i dha fund luftës trevjeçare në vitin 1995.
Pas Bosnjës e Hercegovinës, Wadephul do të udhëtojë drejt Malit të Zi dhe Shqipërisë të hënën, ndërsa mbrëmjen e po asaj dite do të fluturojë për në Serbi. Të martën, ai planifikon të vizitojë Kosovën, përpara se të vazhdojë udhëtimin drejt Maqedonisë së Veriut në mbrëmje.