Banorët e Nju Jork Sitit dhe Nju Xhersit u detyruan të qëndronin në shtëpi ndërsa një stuhi e fortë dëbore përfshiu verilindjen e Shteteve të Bashkuara të dielën në mbrëmje, duke shkaktuar ndalimin e udhëtimeve. Paralajmërime për stuhi dëbore u lëshuan për Nju Jork Sitin dhe Long Ajllandin, Bostonin dhe zonat bregdetare në Delaëer, Merilend, Nju Xhersi, Kënektikat, Rod Ajlland dhe Masaçusets. Një gjendje emergjence u shpall në shtetet e Nju Jorkut, Nju Xhersit, Delaëerit, Rod Ajllandit, Kënektikatit dhe Masaçusetsit.
Shërbimi Kombëtar i Motit (NWS) paralajmëroi se kushtet e stuhisë së dëborës do të “materializoheshin shpejt” nga Merilendi deri në juglindje të Nju Anglisë, duke i bërë udhëtimet “jashtëzakonisht të rrezikshme”. Ai shtoi se 30 deri në 60 centimetra dëborë ishin të mundshme në shumë zona, të shoqëruara me erëra të forta. NWS vlerësoi se rreth 54 milionë njerëz ishin në rrugën e stuhisë, ndërsa zyrtarët në të gjithë rajonin u kërkuan banorëve të shmangnin udhëtimet. Ndërkohë, dukshmëria në shumë zona pritej të ishte 400 metra ose më pak.
Stuhia kishte filluar të godiste Nju Jork Sitin të dielën në mbrëmje. Rrokaqiejt e Uoll Stritit mezi dalloheshin nga lagjja e afërt e Bruklinit mes përkeqësimit të dukshmërisë. Kryebashkiaku Zohran Mamdani urdhëroi një ndalim të udhëtimeve jo-emergjente në të gjitha rrugët nga ora 21:00 ET (03:00 CET) të dielën deri të hënën në mesditë. Ai theksoi se “Nju Jork Siti nuk është përballur me një stuhi të kësaj shkalle në dekadën e fundit.” Punonjësit socialë po u kërkonin të pastrehëve të Nju Jorkut të shkonin në strehimore dhe qendra ngrohjeje.
Mijëra fluturime u anuluan dhe mijëra të tjera u vonuan në të gjithë vendin të dielën, sipas faqes së internetit të gjurmimit FlightAware. Shfaqjet teatrale në Broadway të Nju Jorkut u anuluan, ndërsa shkollat, bibliotekat komunale dhe institucione të tjera u mbyllën të hënën. Në Nju Xhersi, Guvernatorja Mikie Sherrill shpalli gjendjen e emergjencës nga mesdita e së dielës, duke liruar fonde dhe duke lejuar vendosjen e burimeve për të përballuar krizën e motit. Ajo shkroi në X se “po presim kushte stuhie dëbore, dëborë të dendur dhe erëra të forta në të gjithë shtetin – si dhe përmbytje bregdetare.”
Bostoni urdhëroi mbylljen e shkollave publike dhe ndërtesave komunale të hënën. Kryebashkiakja e qytetit, Michelle Wu, tha: “Ne u kërkojmë të gjithëve të planifikojnë paraprakisht, të qëndrojnë të sigurt dhe ngrohtë, dhe të mos dalin në rrugë për të ndihmuar punët tona publike dhe përpjekjet e sigurisë publike.” Parashikuesit gjithashtu paralajmëruan për ndërprerje të energjisë elektrike nga reshjet e dendura të dëborës dhe shpërthimet e fuqishme të erës. Të paktën 22,895 klientë ishin pa energji elektrike në shtetin e Nju Xhersit në orën 19:30 ET (01:30 CET), sipas faqes së internetit poweroutage.us.
Marrë nga Deutsche Welle