Qytetarët e Kosovës kanë marrë në vijimësi premtime nga politikanët për heqjen e vizave dhe lëvizjen e lirë në zonën Shengen, ndërsa këta të fundit nga Brukseli.
Por fakti është se edhe sot që flasim, Kosova mbetet i vetmi vend në rajon pa viza.
Ish-kryediplomati i Kosovës, Enver Hoxhaj, për Rtv Ora thotë se ky proces është bllokuar si nga Brukseli ashtu edhe politika e brendshme.
Hoxhaj: BE ka qenë i padrejtë në raport me Kosovën, jo fair. Nuk ka vlerësuar jo vetëm punën e Kosovës, por edhe vetë punën e institucioneve të BE. Kemi punuar 12 vite që qytetarët e Kosovës të lëvizin pa viza drejt zonës Shengen. KE ka dalë disa herë me raporte, janë miratuar në Parlamentin Europian. Por KE dhe PE përfaqësojnë dhe interesat e shteteve anëtare. Arsyeja pse deri tani nuk ka një vendim pozitiv për Kosovën nuk ka të bëjë me KE, PE, apo Brukselin por shtetet anëtare të BE dhe një gjë e tillë dëmton kredibilitetin e BE në raport me Kosovën, është një trajtim i padrejtë. Besoj se mund të ketë lajme të mira nëse menaxhohet kjo valë e parë e Covid-19. Por liberalizimi i vizave mund të arrihej në 2016 dhe nuk u arrit për shkak të fajit të një pjese të LDK, VV, AAK dhe Nismës. Tani është një temë që është shtyrë në pafundësi. Prandaj në raport me temat e jashtme duhet të jemi më të vëmendshëm dhe strategjikë dhe të mos blejmë kohë.