Kryetari i Partisë Demokratike, Sali Berisha, ka konfirmuar sot se do të paraqitet nesër në SPAK për t’u pyetur lidhur me dosjen e 21 Janarit, ngjarje në të cilën humbën jetën katër protestues gjatë demonstratës së opozitës së asaj kohe në bulevardin “Dëshmorët e Kombit”.
Gjatë një konference për shtyp, Berisha njoftoi se do të shkojë para prokurorëve të posaçëm, ndërsa e cilësoi procesin si të motivuar politikisht.
“Nesër do jem në SPAK. Ndonëse e deklaroj që sot që ky është një hetim politik. Kjo çështje është hetuar me ekspertë shqiptarë dhe ndërkombëtarë, por mua nuk më kanë pyetur një herë,” u shpreh ai, duke shtuar se ftesa e prokurorisë vjen pas shumë vitesh.
Berisha kujtoi rrethanat e protestës së 21 Janarit, duke përmendur se situata në atë ditë ka qenë e tensionuar dhe e dhunshme.
“Kam qenë 5-6 orë në rrethim, në përpjekje për të pushtuar kryeministrinë. Ajo ishte protesta më e dhunshme në historinë e vendit. Me qindra e mijëra gurë janë hedhur drejt gardistëve. Janë hedhur eksploziv, është përdorur një makinë për të thyer portën. Ligji e përcakton qartë reagimin e rojes kur goditet. Pa diskutim që do shkoj,” deklaroi kreu demokrat.
Hetimet për 21 Janarin janë rihapur nga SPAK pas kërkesave të vazhdueshme për zbardhjen e plotë të ngjarjes dhe identifikimin e përgjegjësve.
Deri në momentin e publikimit të lajmit, SPAK nuk ka dhënë një reagim zyrtar mbi detajet e thirrjes dhe procedurën e marrjes në pyetje.