Kryeministri Edi Rama ka zhvilluar sot një takim në kopshtin e Kryeministrisë me përfaqësinë e Kongresit të Shteteve të Bashkuara të Amerikës. Përmes një postimi, Rama ka ndarë momente nga takimi, duke e cilësuar praninë e përfaqësuesve të Kongresit amerikan si një dëshmi të rëndësisë së marrëdhënieve mes Shqipërisë dhe Shteteve të Bashkuara.
Takimi vjen në kuadër të kontakteve të vazhdueshme mes institucioneve shqiptare dhe përfaqësuesve amerikanë, me fokus forcimin e bashkëpunimit dhe partneritetit strategjik mes dy vendeve. Rama ka shoqëruar publikimin me pamje nga takimi në ambientet e Kryeministrisë.
Delegacioni amerikan kryesohet nga kongresmeni Vern Buchanan, kryetar i Komitetit për Partneritetin për Demokraci, dhe gjatë vizitës në Tiranë shoqërohet edhe nga ambasadori i ri i Shteteve të Bashkuara në Shqipëri, Eric Wendt.
Më herët gjatë ditës, përfaqësuesit e Kongresit amerikan u pritën edhe nga kryetari i Kuvendit, Niko Peleshi. Sipas njoftimit zyrtar, në takim u diskutua për forcimin e partneritetit strategjik mes Shqipërisë dhe SHBA-së, bashkëpunimin në fushën e sigurisë dhe mbrojtjes, integrimin e Shqipërisë në Bashkimin Evropian, si edhe zgjerimin e marrëdhënieve ekonomike dhe të investimeve amerikane në vend.
