Editorialin e shkoni duke klikuar videon!
Akoma pa u shpallur data e zgjedhjeve parlamentare, Rama dhe Berisha kanë filluar të bëjnë llogaritë për pushtetin e nesërm, pra sa deputetë merr njeri dhe sa tjetri.
Në fakt PS është më e organizuar, duke mos harruar se është edhe në pushtet e ka pothuaj të gjitha bashkitë.
Kryeministri Rama e hodhi i pari “shishen e molotovit” te dera e Berishës kur deklaroi para disa ditëve se PD do të marrë deputetë sa në vitin 1997.
Rama e bëri këtë krahasim, por me një dallim. Sipas tij, në atë kohë e gjithë Shqipëria ishte në humnerën ku ra ajo parti, ndërsa këtë herë humnera është destinacion ekskluziv i vetëm asaj partie.
“Mbajeni mend sot këtë fjalë, unë nuk shoh filxhan dhe nuk parashikoj të ardhme, por dimë të lexojmë mendjen e popullit, jo vetëm se kemi patronazhistët, por kemi një strukturë shkencore të kolauduar që bën anketimet e përmuajshme të opinioneve të njerëzve.
Në zgjedhjet e ardhshme PD zor se do të marrë më shumë mandate se ne 1997, mbajeni shënim. I vetmi ndryshim është se atëherë e gjithë Shqipëria ishte në humnerën ku ra ajo parti, ndërsa këtë herë humnera është destinacion ekskluziv i vetëm asaj partie. Një destinacion i zgjedhur me vullnet të lirë për udhëheqësve udhëprerë të saj”, tha Edi Rama.
Nëse iu referohemi shifrave të vitit 1997, del se zgjedhjet u mbajtën me dy raunde, njëri më 29 qershor dhe tjetri më 6 korrik (ku zgjedhjet u përsëritën në 32 zona elektorale). Në total Partia Socialiste fitoi 101 mandate, 22 proporcional dhe 79 mazhoritar, ndërsa Partia Demokratike fitoi 25 mandate, nga këto 8 proporcional dhe 17 mazhoritar.
Mandatet e tjera janë ndarë mes Social Demorkatëve 10, PBDNJ 4 mandate, Balli Kombëtar 3 mandate dhe Aleanca Demokratike 2.
Në numër votash, në vitin 1997 PS mori 690 mijë vota ose 52,8% dhe PD 336 mijë vota ose 25,7%.
Pra sipas kryeministrit Rama, PD-ja nuk do të marrë me shumë se 25 deputetë në zgjedhjet e vitit të ardhshëm.
Kjo është katastrofë për opozitën, nëse ndodh ky parashikim.
Natyrisht se nuk jemi në këto shifra, por me përçarjet e forta në PD, lufta e brendshme me thika me njeri tjetrin ka lenë plagë në radhët e demokratëve, ndaj nuk do të kemi rezultat pozitiv. Shto edhe rikandidimin e Berishës për kryeministër dhe rezultati do të jetë i pakëndshëm për opozitën.
Ndërkohë sot Berisha iu përgjigj me të njëjtën mënyrë Edi Ramës. Ai gjatë konferencës online me gazetarët komentoi ndër të tjera edhe deklaratën e kryeministrit Edi Rama, kur tha se Partia Demokratike do të marrë më pak deputetë se në 1997 në zgjedhjet parlamentare të 2025. “Edi Rama do të marrë vota sa mori Ramiz Aliaj në vitin 1992 dhe asnjë votë më shumë. Mos besoni pollet, në të gjitha pollet në diktaturë, narkodiktatura, diktatori i ka në qiell treguesit. Në 1992, partia e krimit, PS-ja para zgjedhjeve ishte 26 pikë sipas Gallupit, para Partisë Demokratike, prandaj dhe ne qëndrojmë për qeveri teknike dhe zgjedhje të ndershme”,-tha Berisha.
Pra të dy deklarojnë fitore por deri tedita e votimeve do të rrjedhë shumë ujë në kampet politike, duke mos harruar se Rama, sic thotë vetë, është 10 hapa para PD-së.
Me gjendjen si është akoma PD-ja fitorja e saj është si endërra e njerëzimit që shkon në planetin Mars, por në muajin mars 2025!