Bashkimi Europian po nis përgatitjet për një fazë të re zgjerimi, ndërsa Komisioni Europian ka prezantuar një komunikim të ri që analizon ndikimin e anëtarësimit të vendeve të reja në funksionimin e Unionit. Dokumenti fokusohet te sfidat që sjell një BE më e madhe dhe te nevoja për përshtatje në disa prej mekanizmave kryesorë të saj, nga procesi i vendimmarrjes dhe politikat e përbashkëta, te buxheti dhe garantimi i shtetit të së drejtës.
Komisionerja europiane për Zgjerimin, Marta Kos, vlerësoi se dy vitet e fundit kanë sjellë një ritëm të ri në procesin e zgjerimit dhe se tani fokusi duhet të jetë edhe te përgatitja e vetë Unionit për anëtarët e ardhshëm.
“Bashkë me shtetet anëtare, kemi bërë më shumë përparim në zgjerim në dy vitet e fundit sesa në dy dekadat e mëparshme. Tani është koha të përgatitemi për një Union më të madh”, deklaroi Kos.
Sipas saj, procesi i zgjerimit duhet të mbështetet në “realizëm dhe pragmatizëm”, ndërsa komunikimi i ri i Komisionit synon të përcaktojë më qartë ndikimin që zgjerimi do të ketë mbi institucionet dhe politikat europiane.
Në qendër të diskutimit është mënyra se si BE-ja do të funksionojë me një numër më të madh shtetesh anëtare. Komisioni vlerëson se zgjerimi kërkon përgatitje të mëtejshme për të garantuar një proces vendimmarrjeje efikas, financim të qëndrueshëm të politikave të Unionit dhe respektimin e standardeve dhe vlerave europiane.
Ky dokument shihet si një hap i rëndësishëm në përgatitjen e BE-së për zgjerimin e ardhshëm, në një kohë kur procesi i integrimit europian është rikthyer në qendër të agjendës politike të Unionit.