Sali Berisha akuzon kryeministrin Edi Rama për shkelje të procedurave ligjore dhe mungesë transparence në lidhje me projektin e Zvërnecit.
Gjatë një bashkëbisedimi online me qytetarët, Berisha deklaroi se situata e krijuar rreth këtij projekti është pasojë e veprimeve të qeverisë, të cilat sipas tij janë shoqëruar me mashtrime, dezinformim dhe vendimmarrje në kundërshtim me ligjin.
Ai theksoi se Partia Demokratike nuk është kundër investimeve të huaja, por kërkon që çdo projekt të zbatohet në përputhje me legjislacionin shqiptar dhe normat ndërkombëtare, duke përfshirë konsultimin dhe informimin e komunitetit lokal.
Duke komentuar protestat kundër projektit në Zvërnec, Berisha tha se PD mbështet të drejtën e qytetarëve për të protestuar, por sqaroi se organizimi i tyre nuk është bërë nga partia që ai drejton.
Sipas tij, qeveria ka dhënë leje zhvillimi dhe ndërtimi në kundërshtim me ligjin, ndërsa ka tentuar t’i mbajë të fshehta këto vendime. Për këtë arsye, ai tha se ka dënuar vazhdimisht veprimet e kryeministrit.
Në fund, Berisha mbështeti kërkesën e protestuesve për dorëheqjen e menjëhershme të qeverisë dhe krijimin e një qeverie teknike jopartiake, e cila do të kishte si mision organizimin e zgjedhjeve të reja.