Kryetari i Partisë Demokratike Lulzim Basha është i pranishëm në aktivitetin e FRPG-së në përkujtim të 8-Dhjetorit, fillimit të Lëvizjes Studentore të 30 vite më parë, ngjarje kjo që solli dhe rrëzimin përfundimtar të diktaturës në vendin tonë.
Basha në lidhje live me të rinj nga Kosova, Maqedonia e Veriut, Lugina e Preshevës, nga Mali i zi dhe mbarë diaspora, deklaroi se sot pas 30 vitesh, dikujt i leverdis që të mbjellë ndjenjat e dorëzimit, pesimizmit dhe braktisjes të vendit.
“Ky komunikim mbarëkombëtar para 30 vjetësh ishte një ëndërr, sot realitet. 30 vjet më parë shembëm diktaturën më të egër komuniste në gjithë Europën. Dallga e ndryshimit historik u mundësua vetëm prej të rinjve idealistë dhe energjikë. Asnjë zhvillim i rëndësishëm për shqiptarët pa rolin protagonist të të rinjve. Edhe sot, ndryshimi i Shqipërisë mund të bëhet vetëm prej rinisë. Kam udhëtuar nëpër Shqipëri për të takuar të rinj të talentuar, por të dëshpëruar me realitetin. Prej 8 vitesh Shqipëria ka dalë nga drejtimi i duhur, ka bërë hapa pas. Varfëria, papunësia, keqqeverisja, shkak për largimin e të rinjve nga Shqipëria. E kuptoj dhe e ndjej dëshpërimin tuaj, kur shikoni propagandën virtuale dhe pastaj përjetoni me sytë e tuaj realitetin. Dikujt i leverdis që të mbjellë ndjenjat e dorëzimit, pesimizmit dhe braktisjes të vendit. Kanë frikë prej parimeve, ideve dhe forcës së rinisë. Të rinjtë shqiptarë shkëlqejnë jashtë Shqipërisë.
Në Shqipëri keqqeverisja i detyron të largohen e të braktisin vendin. Unë besoj me shpirt se ndryshimi i shumëpritur është i mundur. Rini shqiptare, fatet e Shqipërisë, janë edhe sot mbi supet tuaja. Ne sollëm demokracinë në Shqipëri dhe po luftojmë për ta mbrojtur atë çdo ditë. Vetëm me përfshirjen e rinisë, ndryshuam ekonominë nga ekonomia e centralizuar komuniste në një ekonomi të lirë të tregut. Me ju krijuam vende të reja pune, futëm Shqipërinë në NATO, mundësuam lëvizjen pa viza. Ne i arritëm të gjitha këto se besonim se Shqipëria mund dhe do të bëhet. Shumë prej jush të dëshpëruar, mezi prisni ndryshimin. Ndryshimi do të mbajë përsëri firmën dhe vulën e rinisë shqiptare. Po! Shqipëria jonë ka mundësi pa fund për t’u zhvilluar! Kemi një vend të bukur me potenciale të mahnitshme që duhet të përkthehen në te mira për shqiptarët. Ne bashkë jemi zëri i të gjithë shqiptarëve krenarë, që dëbuan diktaturën komuniste nga vendi ynë.
“Shqipëria si gjithë Europa”, një projekt i papërfunduar, një punë e lënë në mes që mbetet për t’u kryer. Kam besim të jashtëzakonshëm tek ju, do të bëj çmos që juve t‘ju jepet mundësia të shpalosni talentet tuaj këtu në vendlindje. Zotohem se si kryeministër do të kufizoj në vetëm dy mandate postin e kryeministrit. Modeli i qeverisjes tregohet që në fillim. Atë që nuk e arrin dot për 8 vjet nuk e arrin dot as 80 vjet. Kur nuk mban asnjë premtim për 8 vjet çfarë mund të japë më shumë një njeri pas 8 vjetësh në pushtet. Në parlament apo me referendum unë do të bëj realitet kufizimin e mandatit të kryeministrit. Ne mund të bëjmë gjëra të mëdha së bashku. Ne mund të arrijmë shumë për vendin tonë. Ne mund ta ndryshojmë të ardhmen e Shqipërisë. Ne mund ta bëjmë Shqipërinë të begatë për të gjithë ju. Për arsimimin tuaj. Për ëndrrat tuaja. Për shpresat tuaja. Ju jeni e ardhmja jonë prandaj është detyra ime të siguroj që ju të keni mundësi që ta kërkoni e ndërtoni lumturinë tuaj këtu në atdhe”, deklaroi ndër të tjera, kreu i PD-së, Lulzim Basha në aktivitetin e FRPG-së në përkujtim të “8 Dhjetorit 1990”.