Lulzim Basha në cilësinë e kryetarit të Demokratëve Euroatlantikë, thotë se do të jenë alternativë në zgjedhjet parlamentare të 2025, pavarësisht vendimit të Gjykatës së Lartë për çështjen e përfaqësimit të PD-së, e ashtuquajtura çështja e vulës.
”Me shpresën që Gjykata e Lartë do të marrë vendimin e duhur, por me përgatitjen për të pamundësuar çdo skenar të mospërfaqësimit të Demokratëve Euroatlantikë në zgjedhjet e ardhshme”, tha Basha në një prononcim për gazetarët pas takimit me Presidentin Begaj si pjesë e konsultimeve për datën e zgjedhjeve.
Sipas Bashës me shpresën që Gjykata e Lartë do të japë pa vonesë vendimin e duhur, në çdo rast demokratët euroatlantikë do të jenë në zgjedhje, me kandidatët, programin dhe me aleancën e tyre. I pyetur për mungesën e tij në diskutimet për buxhetin, Basha tha se Parlamenti ka rënë dhe është kthyer në një mbledhje të zgjeruar të Partisë Socialiste dhe fraksioneve të saj.
