Vijon puna për rikthimin e hapësirave publike në plazhin e Velipojës, si pjesë e angazhimit të kryetarit të Bashkisë Shkodër, Benet Beci, për të garantuar një sezon turistik me akses të lirë dhe të drejtë për pushuesit. Aksioni synon të rikuperojë vijën bregdetare të zaptuar ndër vite nga abuzime dhe përfitime në kundërshtim me ligjin.
Në një postim të mëngjesit të sotëm, kryebashkiaku Beci shkruan:
“Në Velipojë, një tjetër plazh publik po pajiset me sinjalistikë dhe rampa për pushuesit. Ndërkohë, në Rrjoll, Ndërmarrja e Shërbimeve Publike në bashkëpunim me Policinë Bashkiake ka ndërhyrë për lirimin e hapësirave të zëna nga objekte të vendosura pa leje.”
Këto ndërhyrje janë pjesë e një strategjie më të gjerë për sistemimin e bregdetit dhe përmirësimin e përvojës së vizitorëve në zonat turistike të Shkodrës. Ato vijnë në kuadër të përpjekjeve për të kthyer plazhet publike në prona të komunitetit, duke i mbrojtur nga privatizimi i paligjshëm dhe duke siguruar një standard të ri shërbimi e mikpritjeje për vendasit dhe turistët.
AV