Mazhoranca vijon që të përjashtojë nga Kuvendi i Shqipërisë deputetët që janë në krahun e Sali Berishës. Vendimi i fundit është përjashtimi me 10 ditë i vetë Berishës dhe sekretarit të Përgjithshëm të PD-së, Flamur Noka. Deputetët Edi Paloka dhe Belind Këlliçi përjashtohen me 5 ditë.
Flamur Noka dhe Belind Këlliçi kanë deklaruar nga jashtë ambienteve të Kuvendit, se do të jenë të pranishëm në seancën e nesërme pavarësisht vendimit që komisioni i Etikës mund të marrë për përjashtimin e tyre.
Gjithçka nisi nga një intervistë e Berishës që foli për orgji të McGonigal në Tiranë me qeveritarë, por që gjatë seancës plenare të së hënës, deputetet gra të PS-së u shprehën të indinjuara nga gjuha e përdorur nga kreu i PD-së, dhe sot Komisioni i Etikës i përjashtoi. Gjatë seancës të së hënës, Noka pengoi zhvillimet e Kuvendit duke përdorur edhe bilbilin.
”Shikojeni videon me bilbila opozita e atëhershme protestonte për të drejtat e veta dhe as nuk i ndërpreu njeri. Kur ishin në opozitë vetë hynin me megafona, flisnin merrnin edhe mikrofonin e Topallit dhe nuk i ka ndaluar askush. Kjo është demokracia”,-tha Noka.
Deputeti demokrat Saimir Korreshi e ka cilësuar “absurd” vendimin dhe shprehet se s’mund të përjashtohen deputetët vetëm se kanë përdorur fjalët “orgji” dhe “McGonigal” pasi Rama përdor fjalë shumë herë më të rënda në parlament.