Partia Demokratike denoncoi një tjetër rast të emërimit Sekretarit të Përgjithshëm të Ministrisë së Brendshme në kundërshtim me ligjin.
Ish-deputeti Klevis Balliu deklaroi se bëhet fjalë për Plarent Ndrecën i cili, sipas tij është pjesë e Këshillit Bashkiak dhe anëtar partie.
Në një intervistë për Ora News, ai thotë se KLSh ka dy raporte në lidhje me Ndrecën që së shpejti do të bëhen publike.
Balliu: Ju keni raste të tjera pafund. Ju keni dhe Sekretarin e Përgjithshëm të Ministrisë së Brendshme, Plarent Ndreca i cili nuk duhet të jetë aty sepse është dhe anëtar i Këshillit Bashkiak dhe anëtar partie dhe me ligj nuk lejohet që të jetë sekretar i përgjithshëm. Për këtë njeri ka dy raporte nga KLSh. Një kur ka qenë në Ministrinë e Arsimit dhe një kur ka qenë në Ministrinë e Brendshme dhe ky nuk largohet. Jam i sigurt që sëshpejti ato dy raporte do bëhen publike. Ministria e Brendshme është kthyer në shërbim të Edi Ramës dhe jo të qytetarëve. I kanë kthyer qytetet e Shqipërisë si qytetet e Kamorrës, kemi çdo ditë vrasje dhe shpërthime tritoli në një qytet. Njerëz që ecin të armatosur në qytetet e Shqipërisë. Ministria e Partisë (Brendshme) është në shërbim të krimit, nuk e shohin si kundërshtar.Socialistët në tërësi kanë një problem gjenetik me lirinë. Nuk e duan fjalën ndryshe.