Ministri i Brendshëm, Sandër Lleshaj gjatë një diskutimi në Kuvend në lidhje me sigurinë dhe rendin në vend, ndër të tjera ka dhënë sqarime edhe për investigimin e publikuar nga gazeta “Insajderi” se qeveria ”Rama 2” mori gaz për protestat nga Kosova, me urdhër të Presidentit Hashim Thaçi. Lleshaj e pranon se qeveria ka marrë një sasi me gaz në muajin qeshor, kohë kur opozita ishte në protesta të fuqishme por thotë se nuk është përdorur.
“Kjo pyetje e ka marrë përgjigjien nga ne, por unë po e përsëris prapë. Në vitin 2019 institucionet tona u vunë përballë sulmeve të dhunshme, që kanë rrezikuar jetën e qytetarëve shqiptarë. Përballë këtyre kushteve, PSH ka aplikuar një strategji 110 që ishte deskaluese, që synonte jo përshkallëzim. Policia ka vepruar gjithmonë një hap më pas nga ata që ka patur përballë, ky është njëshi i parë. Policia ia ka dalë që të mos ketë asnjë viktimë. Kemi mbrojtur lirinë e qytetarëve, kemi mbrojtur të drejtën e protestës. Sipas nesh angazhimi ka qenë tamam sipas librit të shkollës më të miër evropiane. Nëse jeni të interesuar nga ka ardhur gazi, mund të kërkoni informacion. Gazi është përdorur nga rezervat që kemi patur që nga qeveria më e mëparshme. Se kam dëgjuar spekulime, jo po ka ardhur nga Kosova. Po kemi marrë një sasi gazi nga Kosova në muajin qershor, por është aty dhe s’është përdorur. Është fatkeqësi për këdo që merr dhe ballafaqon gra dhe pleq para policisë”.