Sali Berisha shkoi këtë të mërkurë në SPAK dhe qëndrimi aty zgjati vetëm pak minuta. Edhe pse ishte thirrur të paraqitej në Prokurorinë e Posaçme në orën 12:00, zgjodhi që fillimisht të takonte militantët që kishin dalë ta mbështesnin, sipas porosisë së Flamur Nokës, por edhe për të komunikuar me gazetarët.
Pas orës 12:20, Berisha i shoqëruar nga avokati i tij Genc Gjokutaj i janë drejtuar detektorit të vendosur në hyrje në SPAK. Burimet i thanë Top Channel se Berishën dhe Gjokutajn në Prokurorinë e Posaçme i kanë pritur dy prokurorët e çështjes Arben Kraja dhe Enkelejda Millonai.
Mësohet se biseda e tyre ka qenë formale, aq sa dy prokurorët i kanë dhënë dosjen me akuzat, që siç bëri të ditur për mediat ishte rreth 500 faqe. Berisha la SPAK-un dhe iu drejtua sërish mediave, ku njoftoi se ishte marrë i pandehur.
