Ministrja e Bujqësisë dhe Zhvillimit Rural, Anila Denaj vizitoi këtë të premte fabrikën e përpunimit të fruta-perimeve në Lezhë, një sipërmarrje e ngritur nga fermeri Tom Malshi, i cili prej vitesh i është përkushtuar konservimit të ullinjve të tavolinës.
Denaj tha se me një kapacitet prej mbi 6000 tonë në vit dhe një rrjet eksportesh në zgjerim të vazhdueshëm, kjo sipërmarrje sjell prodhime cilësore “Made in Albania” në tregjet ndërkombëtare, përfshirë kontratën më të fundit me Azerbajxhanin.
”Në këtë vizitë prezantova edhe tri linjat e reja të financimit, ku përmes Skemës Kombëtare të Investimeve (50% grant), të kombinuar me Kredinë e Butë dhe Garancinë Sovrane, çdo fermer dhe agropërpunues mund të përfitojë: financim me vetëm 2% interes dhe mbulim kolaterali deri në 70%”, tha ministrja.
Po ashtu Denaj bëri të ditur se me këtë mbështetje konkrete, po synohet fuqizimi i prodhimit vendas, po nxitet rritja e vazhdueshme e eksporteve dhe po krijohet një ekonomi e qëndrueshme për zonat rurale në përputhje me vizionin e qeverisë “Bujqësia 2030”. Përfaqësuesi i kompanisë u shpreh se tregu i ullirit në Shqipëri është i garantuar.