Kryeministri Edi Rama në një konferencë të përbashkët me Komisionerin për Zgjerimin e Bashkimit Europian, Olivér Varhelyi, tha se nëse nuk hapen negociatat në qershor, Shqipëria do të kërkojë ndarje nga Maqedonia e Veriut.
”Nuk ka asnjë rezervë ndaj nesh, por gjithçka lidhet me ngërçin e krijuar nga veto e Bullgarisë ndaj Maqedonisë së Veriut. Ne jemi në një kurs që e ka përcaktuar pozicionin tonë si konstruktiv dhe të lidhur me Maqedoninë dhe për mos ndarjen. Ky është pozicioni ynë aktual. E njoftova Komisionerin që ne e kemi kryer një proces këshillimi kombëtar dhe mbetet aktivizimi si qasje për ndarje pas mbledhjes së takimit të Këshillit Evropian”, tha Rama.
