Ministrja e Shëndetësisë, Ogerta Manastirliu, mbajti një konferencë për mediat në lidhje me masat e marra për përballimin e Covid-19, ku fjalën e nisi me një falënderim të veçantë për të gjithë stafin mjekësor, i cili tashmë prej 10 muajsh përballet me pandeminë e koronavirusit, ku paralajmëroi se vendin e presin muaj jo të lehtë.
”Tashmë prej 10 muajsh, mjekët, infermierët, epidemiologët, urgjenca dhe ekipi i shëndetësisë po përballen me Covid-19. Gjej rastin t’i falënderoj edhe njëherë pasi nuk kanë qenë muaj të lehtë sepse dua t’i inkurajoj dhe motivoj për atë që do të sjellë situata në vijim, pasi nuk do të kemi muaj të lehtë në përballje me pandeminë. Sistemi ynë shëndetësor numëronte rreth 200 respiratorë në muajin mars. Sot në sistemin tonë kemi 483 respiratorë të dedikuar në funksion të mbështetjes së terapive intensive”, u shpreh Manastirliu.
Nga ana tjetër, Manastirliu tha se Shqipëria ka siguruar 100 mijë teste të shpejta për Covid-19. Ajo tha se do të hyjnë në funksion që prej të hënës (14 dhjetor) në Tiranë. Ministrja bëri me dije se janë 550 shtretër në të 4-tër spitalet Covid.
“Kemi dyfishuar kapacitetet e shtretërve në spitale, kemi 550 shtretër në 4 spitalet Covid. Kemi fuqizuar spitalet me mjete spitalore. Sistemi ynë shëndetësor në spitalet Covid dhe ato rajonale kemi 483 respiratorë. Kemi siguruar terapitë e trajtimit me medikamente. Kemi garantuar barnat falas për pacientët që do të trajtohen në banesa. Kjo mbështetje ka nisur prej muajit nëntor. Përmes mjekut të familjes qytetarët përfitojnë barnat falas. Jemi angazhuar në disa drejtime për të patur vaksinat anti-covid që do ta bëjmë falas. Ashtu sikurse e kemi thënë, në funksion të kufizimit të përhapjes së infeksionit, bazuar në vendimet e Komitetit Teknik të Ekspertëve në kemi marrë të gjitha masat në kohë për përfshirjen e testimit të shpejtë. 100 mijë teste të shpejta të njohura nga OBSH që janë të disponueshme në vendin tonë që do të vendosen në funksion në strukturat spitalore. Do të nisë nga dita e hënë në Tiranë. Do të jetë i disponueshëm në të gjithë njësitë vendore të kujdesit shëndetësor”,-tha Manastirliu.
Shefja e departamentit të sëmundjeve infektive në ISHP, Silva Bino, thotë se testi i shpejtë, i cili është siguruar nga Shqipëria është gati 100% efektiv dhe ndihmon autoritetet për hetim epidemiologjik në kohë reale.
Testi i shpejtë identifikon antigenin, mund të ketë edhe teste të tjera të testeve të shpejta por nuk identifikojnë antigenin. Pra, kjo është e rëndësishme. Ky test përdoret për qëllime diagnostifikuese. Ajo ç’ka është e rëndësishme tjetër është se ky test duhet të kryhet atëherë kur kemi një ngarkesë virale të lartë, brenda 5 ditëve të para të sëmundjes. Nëse do të kemi një person përtej 5 ditëve të para atëherë do të bëhet testi PCR. Ka një efikasitet gati 100%. Kjo e afron atë me PCR dhe nuk ka nevojë të përsëritet. Përgjigjet merren brenda 30 minutave dhe kjo është një lehtësi shumë e madhe për hetimin epidemiologjik në kohë reale. Po kryhen trajnime në lidhje me testin, i cili është i njohur nga OBSH dhe i aprovuar nga Agjencia e Kontrollit të Barnave dhe Ushqimeve në SHBA”, tha Bino.
Në sallë u demostrua dhe mënyra sesi do të aplikohet ky test. Ishte një mjek i cili tregoi për mediat e pranishme proçesin i cili zgjat 20 minuta. ”Në këtë qese janë tamponët sterila që janë plastike. Bashkohet tamponi. Rrotullohet 5 gjashtë herë dhe lëshohen me solucionin pufer. Bashkohet me tapën. Pas 20 min presim reaksionin të ndodh dhe nëse kemi reakasion pozitiv ndodh kur dy banet jane ne ngjyr të kuqe”,-tha mjeku.