Kryetari i Partisë së Lirisë, Ilir Meta këtë të hënë foli nga aksi Ersekë-Korçë, ku para dy ditësh ka ndodhur edhe shembja e dytë e rrugës së re. ”Siç mund ta shikoni lehtësisht, e një pjese të saj dhe mureve mbrojtëse”, tha Meta.
Meta shtoi edhe se në Shqipëri çdo tender është i kontrolluar nga Edi Rama. ”Në Shqipëri të gjitha projektet janë të fryra artificialisht nga Edi Rama. Në Shqipëri një kilometër rrugë e re kushton 5-6 herë më shumë sesa në Serbi dhe vende të tjera të rajonit”,-tha kreu i PL-së.
I pyetur nëse ka ndonjë nisëm konkrete nga Partia e Lirisë, për këto tendera, Meta tha se ata kanë bërë veprimet e tyre për shumë nga aktet dhe PPP-të e kësaj qeverie që nuk mbarojnë.
”I bëjmë thirrje qytetarëve që të denoncojnë çdo akt korrupsioni, u bëjmë thirrje gazetarëve të mos dorëzohen nga presioni. Sepse e dimë që edhe për këtë shembjen që ka ndodhur përpara dy ditësh, ka pasur një përpjekje të madhe për të bërë një censurë të jashtëzakonshme”.