Më shumë se 70 mijë tifozë ishin të pranishëm në San Siro për debutimin europian të Milanit të drejtuar nga Ruben Amorim ndaj Benfikës. Megjithatë, një person i veçantë tërhoqi vëmendjen e publikut dhe kamerave: Antonio Conte.
Prania e trajnerit italian në tribunat e stadiumit ka ndezur menjëherë imagjinatën e tifozëve kuqezi, veçanërisht pas një tjetër paraqitjeje zhgënjyese të Milanit. Në fund të takimit, pas humbjes, pakënaqësia e tifozëve u shpreh qartë përmes vërshëllimave drejtuar Amorimit dhe skuadrës.
Në këtë situatë, emri i Antonio Contes u rikthye fuqishëm në diskutimet e tifozëve, duke e kthyer trajnerin italian në një prej emrave më të përfolur për stolin e Milanit.
Megjithatë, sipas informacioneve që vijnë nga Italia, prania e Contes në San Siro nuk duhet interpretuar si një sinjal për një transferim të mundshëm te Milani. Ish-trajneri i përfaqësueses italiane e ka ndjekur ndeshjen për interes personal dhe profesional, pa pasur aktualisht ndonjë lidhje me një ndryshim të mundshëm në stolin kuqezi.
Emri i Antonio Contes nuk po lidhet vetëm me Milanin. Edhe te Juventusi situata e trajnerit Luciano Spalletti është kthyer në qendër të vëmendjes pas humbjes ndaj Sassuolos në Reggio Emilia.
Juventusi do të kërkojë reagimin në ndeshjet e ardhshme kundër NEC dhe Atalantës, me rezultatet e këtyre sfidave që mund të ndikojnë ndjeshëm në klimën rreth pankinës bardhezi.
Në të njëjtën kohë, në Itali raportohet se Conte mund të jetë i pranishëm edhe në Allianz Stadium për të ndjekur nga afër përballjen e Juventusit me skuadrën holandeze. Edhe në këtë rast, prania e tij nuk konsiderohet domosdoshmërisht si sinjal për një rikthim në stolin e Juventusit.