
Egnatia ka shkruar historinë në futbollin shqiptar, duke fituar për herë të parë titullin kampion në Abissnet Superiore, pas një fitore të thellë dhe bindëse 0-4 ndaj Vllaznisë në finalen e zhvilluar në “Arenën Kombëtare”.
Pas këtij suksesi historik, Presidenti i Federatës Shqiptare të Futbollit, Armand Duka, ka uruar rrogozhinasit për arritjen e jashtëzakonshme. Në një postim zyrtar, kreu i FSHF-së e cilësoi sezonin e Egnatias si të jashtëzakonshëm, duke përgëzuar jo vetëm kampionët e rinj, por edhe të gjitha skuadrat pjesëmarrëse në kampionat.
Postimi i Armand Dukës:
Urime ekipit të Egnatias për fitimin e titullit kampion në Abissnet Superiore!
Një sezon fantastik, me beteja të shumta deri në momentet e fundit në kampionatin e rregullt dhe i mbyllur me një finale me emocione në “Arenën Kombëtare”.
Përgëzime për fituesit dhe për të gjitha ekipet garuese, duke nisur nga Vllaznia finaliste e deri tek ekipi i fundit që garoi në Abissnet Superiore për të arritur objektivat e veta.
Urime lojtarëve të Egnatias, stafit teknik, drejtuesve dhe tifozëve që ndoqën dhe mbështetën skuadrën e tyre në këtë rrugëtim të përmbyllur me trofe.
Dëshiroj shumë një përfaqësim sa më dinjitoz të ekipeve tona në kupat e Europës në vazhdim, që do të ishte edhe shpërblimi më i madh për punën e bërë gjatë gjithë sezonit futbollistik.
