Italia përgatitet të zbresë për herë të pestë në historinë e saj në fushën e Stade de France, stadiumi në Saint-Denis me kapacitet rreth 80 mijë spektatorë dhe më i madhi në Francë.
Bilanci i “Azzurrëve” në këtë impiant është pozitiv në total, me dy fitore, një barazim dhe një humbje. Megjithatë, situata ndryshon kur përballë është Franca.
Italia nuk ka arritur asnjëherë ta mposhtë Francën në kohën e rregullt në Stade de France. Përballja e parë e paharrueshme ishte në çerekfinalet e Botërorit 1998, kur ndeshja u vendos nga penalltitë. Italia u eliminua pas ekzekutimeve nga pika e bardhë, ndërsa Roberto Di Biagio goditi traversën në momentin vendimtar.
Tetë vite më vonë, në shtator 2006, “Les Bleus” triumfuan sërish në Saint-Denis, këtë herë me rezultatin 3-1, në një ndeshje të vlefshme për kualifikueset e Kampionatit Europian.
Dy fitoret e Italisë në Stade de France kanë ardhur ndaj kundërshtarëve të tjerë. E para ishte në Botërorin 1998, kur Italia mposhti Austrinë 2-1. Fitorja e dytë erdhi në Europianin 2016, kur Italia e drejtuar nga Antonio Conte zhvilloi një nga ndeshjet e saj më të mira në atë turne. “Azzurrët” mposhtën Spanjën 2-0, me golat e Giorgio Chiellinit dhe Graziano Pellès.