Giovanni Sartori ishte i pranishëm në tribunat e stadiumit të San Marinos për të ndjekur nga afër përballjen mes San Marinos dhe Shqipërisë. Prania e drejtorit teknik të Bolognës ka tërhequr vëmendjen, pasi klubi italian po monitoron situatën e Elseid Hysajt.
Sipas raportimeve, mbrojtësi i Kombëtares shqiptare i është propozuar Bolognës si një alternativë për krahun e djathtë të mbrojtjes. Hysaj nuk u aktivizua në sfidën ndaj San Marinos, ndërsa e ardhmja e tij mund të lidhet sërish me një rikthim në Serie A.
Megjithatë, shqiptari nuk është aktualisht objektivi kryesor i Bolognës. Prioriteti i klubit mbetet Matteo Darmian, për të cilin drejtuesit pritet të marrin një vendim përfundimtar gjatë kësaj jave.
Nëse pista Darmian dështon, atëherë Hysaj mund të ngjitet në listën e alternativave të klubit italian dhe të shndërrohet në një opsion konkret për përforcimin e mbrojtjes.
Fakti që Sartori ishte në stadium për ndeshjen e Shqipërisë e bën edhe më interesante situatën. Drejtori teknik i Bolognës pati mundësinë të ndiqte nga afër lojtarët kuqezi, ndërsa Hysaj është një prej emrave që tashmë është lidhur me klubin italian.
Mbrojtësi shqiptar e njeh shumë mirë futbollin italian. Ai ka luajtur më parë me Empolin, Napolin dhe Lazion, duke krijuar një eksperiencë të gjatë në Serie A përpara se të vijonte karrierën jashtë Italisë.