Edin Dzeko po përgatitet të mbyllë karrierën pikërisht me fanellën e Romës, pasi po merr në konsideratë rinovimin e kontratës me verdhekuqtë. Sulmuesi boshnjak do të festojë ditëlindjen e 35-të në marsin e vitit të ardhshëm dhe tani e ka të qartë që asnjë klub i madh nuk mund t’i ofrojë një kontratë, ndaj po merr në konsideratë ofertat e drejtuesve të rinj të Romës.
Dzeko pritet të firmosë një kontratë që do ta lidhë me Romën deri në verën e 2023-shit, kohë kur sulmuesi të ketë 37 vite mbi supe, por me kushtin që boshnjaku të pranojë një ulje page të konsiderueshme.
Kontrata aktuale e Dzekos me Romën skadon në verën e 2022-shit, ndërsa sulmuesit i është ofruar zgjatja edhe me një tjetër sezon, por me një pagë më të ulët sesa 4.5 milionë eurot që fiton aktualisht. Ky është sezoni i gjashtë i sulmuesit boshnjak me fanellën e Romës, gjatë të cilëve ka luajtur 224 ndeshje dhe ka shënuar 106 gola.
