Trajneri i Bayern Munich, Vincent Kompany, ka folur në konferencë për shtyp në prag të ndeshjes së kthimit të gjysmëfinales së Champions League kundër Paris Saint-Germain, ku bavarezët do të tentojnë të përmbysin humbjen 5-4 të ndeshjes së parë.
Tekniku belg theksoi se ecuria e takimit do të varet nga qasja e të dyja skuadrave: “A mund të presim të njëjtën ndeshje si javën e kaluar? Kjo varet gjithmonë nga të dy ekipet. Nëse njëra vendos të tërhiqet dhe të mbrohet më shumë, mund të ketë faza më të qeta loje. Përndryshe, jo. Është e vështirë të imagjinohet që ndonjëra skuadër të ndryshojë stilin që e ka sjellë deri këtu”.
Kompany nënvizoi gjithashtu rëndësinë e faktorit fushë dhe mbështetjes së tifozëve: “Luajmë në shtëpi, duam të fitojmë dhe do të bëjmë gjithçka për ta arritur këtë. Ka një raport shumë të mirë mes skuadrës dhe tifozëve. Në fillim të sezonit, ndoshta jo shumë besonin se mund të arrinim në finale, por tani që jemi këtu, kemi përjetuar shumë momente speciale. Besoj se tifozët e ndjejnë se mund t’ia dalim”.
Trajneri u ndal edhe te aspekti psikologjik i përgatitjes së ndeshjes: “Për mua, qetësia e brendshme është thelbësore. Mundohem të mos ndikohem nga emocionet shumë herët. Madje po mendoj edhe për fjalët e fundit motivuese për skuadrën”.
Në fund, Kompany theksoi pragmatizmin si çelës suksesi: “Misioni ynë është të fitojmë ndeshjet, kjo është ajo që ka rëndësi, jo filozofitë. Kemi fituar shumë ndeshje, ashtu si edhe PSG. Nëse arrijmë të fitojmë pa pësuar gol, aq më mirë. Por mbi të gjitha, rëndësi ka fitorja”.