Corinthians po kërkon me urgjencë një trajner të ri për të drejtuar skuadrën, ndërsa drejtuesit e klubit brazilian po shqyrtojnë disa kandidatura për të gjetur pasuesin e duhur.
Mes emrave të përzgjedhur ishte edhe Sylvinho, ish-trajneri i Kombëtares shqiptare, i cili aktualisht është pa skuadër pas përfundimit të aventurës së tij me Shqipërinë.
Sipas të përditshmes braziliane Globo, fillimisht Corinthians tentoi të bindte trajnerin argjentinas Ramón Díaz për të marrë drejtimin e ekipit, por ky i fundit refuzoi ofertën. Pas kësaj, klubi i njohur brazilian iu drejtua Sylvinhos, i cili ka qenë pjesë e tij edhe më parë.
Megjithatë, ish-trajneri i Shqipërisë vendosi të mos e pranonte propozimin. Ai falënderoi drejtuesit e klubit për interesimin, por refuzoi mundësinë e rikthimit në Brazil.
Ndërkohë, Corinthians ndodhet në një situatë të vështirë në kampionatin brazilian. Skuadra renditet në vendin e 16-të me 32 pikë dhe është vetëm një pikë larg zonës së rënies nga kategoria.
Për këtë arsye, gjetja e një trajneri të ri është kthyer në një çështje urgjente për klubin, i cili synon të përmirësojë rezultatet dhe të sigurojë qëndrimin në elitën e futbollit brazilian. Refuzimi i Sylvinhos e detyron tashmë Corinthians të vijojë kërkimet për një emër tjetër që mund të marrë përsipër drejtimin e skuadrës në këtë periudhë delikate.