Dejan Kulusevski, futbollist i Juventusit që nga kjo verë, nuk e ka pritur aspak mirë lënien në stol në super sfidën ndaj Francës.
I aktivizuar vetëm në minutën e 70-të të ndeshjes, për të zëvendësuar Sebastian Larsson, ish-mesfushori i Parma-s është shprehur shumë i habitur për faktin se nuk ka qenë titullar.
Sipas portalit suedez AftonBladet, Kulusevski e ka komentuar në mënyrë të drejtpërdrejtë vendimin e trajnerit Andersson.
“Nuk kam patur kohë të kisha një ndikim te ndeshja. Jam tronditur nga fakti se jam aktivizuar nga stoli. Në stërvitje ka shkuar gjithçka mirë, por nuk e di. Edhe kjo është pjesë e futbollit. E pranoj se është një ndjesi e çuditshme, por e respektoj zgjedhjen e trajnerit”, deklaroi Kulusevski.