Arlindi nuk ka projekt, Qorri është projekt!

Nga: Çim Peka

Të njëjtët gazetarë, që e pranojnë se më 14 Maj nuk kishte zgjedhje por votime, të njëjtët që e pranojnë se euro ra në minimumin historik pasi qindra miliona u përdorën për të blerë vota, të njëjtët që e pranojnë se opozita reale nuk kishte as komisionerë e as numërues, ata që e pranojnë se Rama ia vodhi edhe logon dhe ia fshiu dhe emrin nga fleta e votimit, janë po ata që thonë se opozita humbi dhe se Rama fitoi!

Pastaj shtojnë… ‘jemi kundër Ramës, por Pro Arlind Qorrit (vetëm me opozitën jo), se ky i ka shpallur luftë oligarkëve.

Sot, gjëja më e lehtë është të dalësh e të sulmosh Shefqet Kastratin, Samir Manen e Ram Gecin. Asgjë nuk të ndodh. Madje merr ndonjë donacion me raste prej tyre, që t’i atashosh me Ramën. Që në fakt qarkullojnë edhe paratë e tij.

Ata që nuk mund t’i sulmosh ti Arlind është ‘Tomka dhe shokët e tij’. Ata që nuk guxon të sulmosh janë pronarët e kullave tek ‘Gjykata e Tiranës’, janë ata qe kanë zaptuar bregun e Velipojës, ata që kanë pushtuar bregun e Himarës, ata që sjellin tonelata droge në portin e Durrësit me leje nga shteti. Dhe janë pikërisht këta që kanë bërë diferencën në favor të pushtetit në zgjedhjet lokale.

A i përmend këta Arlind Qorri me emër? Kurrë!

A e dini se sipas BSH, për të rënë në nivelet që ra euro gjatë muajit maj, duhej që në Shqipëri të ishin futur 300 – 400 milionë euro?!

300 – 400 milionë euro për 15 ditë pa turistë vetëm droga mund t’i fusë, askush tjetër.

Dhe çfarë thotë Qorri?!-Rama, Berisha, Meta janë në pushtet dhe janë njëlloj. Në Shqipëri nuk është bërë asgjë në këto 33 vjet, Shqipëria ka shkuar pas, ishim më mirë në komunizëm se nuk kishte korrupsion.

A dini ndonjë diktaturë që nuk vjedh?!

Ajo që të vjedh edhe jetën, nuk të vidhka paratë Arlind?!

Po të bëjmë disa krahasime:

Në këto 30 vjet a u krijua ekonomia e tregut?

Në këto 30 vjet a u zhvillua infrastruktura e vendit?

Në këto 30 vjet a u zgjidh problemi energjetik i vendit me nevojat kolosale të kohës?

Në këto 30 vjet, a u bë Shqipëria pjesë e aleancës më të madhe ushtarake botërore duke sjellë garanci për këtë vend?

Në këto 30 vjet, a u bë e mundur lëvizja e lirë e shqiptarëve?!

Kush ishte në krye të shtetit kur u bënë këto? – E djathta e brishtë shqiptare, Arlind!

Ishim më mirë në kohë të Enver Hoxhës kur nuk kishim asgjë nga këto?!

Po, në këto 30 vjet Shqipëria u shndërrua edhe vendi kryesor transit i drogave të forta nga Azia në Europë.

Në këto 30 vjet u shndërrua Shqipëria edhe në prodhuesin kryesor të kanabisit.

Në këto 30 vjet u kthye në sistem edhe blerja masive e votës me lekët e kontenierëve të drogës.

Në këto 30 vjet u kthye në sistem edhe shndërrimi i administratës civile në administratë elektorale.

Në këto 30 vjet u bë e mundur edhe që bandat të prodhojnë në çdo palë zgjedhje, rreth 30 deputetë nga 140 që ka parlamenti.

Po kush e drejtoi dhe po e drejton Shqipërinë kur ndodhën këto, Arlind?!

E di dhe ti: Edi Rama!

Atëherë, si qenkan njëlloj Berisha dhe Rama, zoti Qorri?!

Prandaj Arlind ti nuk ke projekt!

Ti je projekt! Dhe je projekt i Ramës, sepse Rama sot ka nevojë vetëm për një gjë, për ata që i japin zë, tezës se të gjithë janë njëlloj.

E gjithë sjellja jote dhe artikulimi juaj është ai i ‘MJAFT’, edhe mbështetësit janë të njëjtë.

Të njëjtën gjë bënte dhe Nano e Rama me Veliajn atë kohë. U jepte hapësirën televizive në TV-të e tyre për të thënë se të gjithë janë njëlloj.

Si ka mundësi që mediat e regjimit të japin hapësirë për të sulmuar regjimin?! Për të sulmuar ‘oligarkët’, por jo baronët e drogës që kanë 30 mandate në Kuvend, mandate që mbajnë Ramën në pushtet prej 10 vjetësh?!

Dikur dilte Veliaj, Elisa e Olta, të palarë dhe pa asnjë raport me shampon në shenjë ‘solidariteti’ me banorët e Tiranës, që nuk kishin ujë në shtëpi.

Shikoji sot, nuk dallohet Elisa e palarë e ‘Mjaft’ me Bora Zemanin, Olta me Rita Orën, Lali me Noizin.

Prandaj Arlind ti nuk ke projekt, ti je projekt.

Projekt për të vënë shenjën e barazisë, pasi për këtë ka nevojë Rama. E ‘lufton’ regjimin nga mediat e regjimit, e ‘lufton’ regjimin’ nga auditorët e regjimit, nga aty ku pedagogët e tjerë nuk kanë leje të postojnë një status kundër Ramës e jo më të bëjnë parti kundër tij.

Kaq e thjeshtë është.

Duke njohur jo pak ‘mjaftistë’, jam i sigurt që në organizatën tënde simotër, kriter promovimi është edhe se kush ka tymosur në moshë më të re…

Ramës i duhet një ‘Mjaft’ kundër opozitës për 2025-n.

Historia përsëritet.

Ashtu si Nano në 2001-shin përdori PDR kundër PD, ashtu si Rama përdori Alibeajn e Bashën më 14 Maj, tani i duhet ‘Mjafti’ i ri për 2025-n.