Nga Edison Ypi
Miss Fushata
Djalli bërtet shumë. Bën shumë zhurmë. Të shurdhon. Të tmerron. Të dëshpëron. Duket sikur nga çasti në çast, për shkak të Djallit dhe djallëzive, bota do hidhet në erë, do bëhet copash, jeta mbi tokë do marrë fund.
Po shyqyr, thuaj, që në momentet kritike, kur e tepron Djalli, ndërhyn Zoti, që Djallin e pengon, e ndal. Jo përgjithmonë. Deri në tentativën tjetër destruktive.
E kështu me radhë, kur e tepron Zoti e korrekton Djalli, kur e 10 Djalli e ndreq Zoti, dhe Bota vazhdon të mbetet 1 copet, rrotullimin nuk e ndal, Jeta vazhdon, gumëzhin.
Po të mos e bënte zap Zoti Djallin dhe Djalli Zotin periodikisht, bota do ishte asgjësuar me kohë, ose do kishte mbetur në Epokën e Gurit, njerëzit do hanin të gjallë njëritjetrin.
Edhe fushata elektorale e këtyre ditëve ndeshje e Zotit me Djallin është. Punë si gjithë punërat që mund të kryhet mirë ose keq, me hile ose ndershmërisht, djallëzisht apo shenjtërisht.
Me gjithato punë që kanë, Zoti në qiell dhe Djalli në skëterrë, nuk mund të zbresin vetë në tokë për tu mësuar shqiptarëve si bëhet fushata elektorale për së mbari apo kujt duhet me ja dhën votën që Shqipëria të forcohet e begatohet. Ata dërgojnë përfaqësuesit e tyre.
Djalli dërgon Sali Kullën, alias Doktor hajdutin.
Zoti, Hirësinë e Saj, Miss Fushatën.
Sali Kulla, ky Dreq gjenial, ky që kurrë nuk ja lë pushkën në faqe Djallit, nuk lë prapësi pa bërë: Bërtet, ulëret, shan, gënjen, vjedh, shpif, trillon, kërcënon, shpenzon miliona dollaro nga paret e vjedhura për të hequr njollën e vet që ja ka kopsit dhe ja ka qëndis për merak vendi më demokratik dhe më i fuqishëm i botës. Vepron, reagon, sikur damkën në fjalë nuk ja ka shkaktuar vetes së vet për interesin e vet, por ja ka kurdisur fshehtas Partia Demokratike, ajo që me këtë muhabet s’ka asnjë lidhje absolutisht. Ky qëndrim, dinak dhe burracak i Sali Kullës, kjo arratisje skizofrenike nga realiteti në botën e ëndërrave donkishoteske, kjo braktisje e turpshme e sheshit të burrave dhe arenës së luftës, ky transferim artificial i vëmendjes nga katundet dhe qytetet e Shqipërisë ku zhvillohet fushata, në një tjetër vend mijëra kilometra larg, kjo tradhëti e rëndë ndaj gjithçkaje që i kanë besuar votuesit idealistë demokratë, kjo mçefje hilacake, kjo lënie në baltë e shokëve, ky shpërdorim makabër i besimit të elektoratit, tmerron, vret shpresat, pakson votat, largon e largon pafund ditën e ardhjes në pushtet mbas 12 vitesh opozitë, me gjasa përgjithmonë.
Krejt ndryshe me çmendurinë kriminale të misionarit të Djallit Sali Kulla, ndodh me të dërguarën e Zotit, Miss Fushatën.
Ndërkohë që Sali Kulla, rrethuar nga një batalion me roja me kufje në vesh për ta mbrojtur nga rrahësa ose prekësa imagjinarë, sikur Sali Kulla nuk është njeri por bombë që shpërthen me touch si të celularit, Sali Kulla arratiset sa më larg nëpër metropolet e botës duke shpërdoruar milionat e shqiptarëve për interesat e veta, Mis Fushata, pa asnjë roje, pa asnjë distancë, pa asnjë kapadaillëk banal, fare thjeshtë, krejt e qetë, po aq e shpenguar sa kur si Kryetare e Parlamentit pret e përcjell kryeministrat dhe presidenrat e botës, sa edhe kur ha byrek me hithra dhe pi dhallë me banorët e Luzit apo çmallet me bujqit e Rrogozhinës apo fermerët e Kavajës, bën krejt të kundërtën e Sali Kullës: Pa zallamahi, pa zhurmë, pa potere, pa trilluar, pa shpifur për askend, ikën nëpër fshatra, qytete, lokalitete. Ku takon njerëz, popull. Llafoset me hallexhinj. Flet e kuvëndon shtruar për zgjidhjen e problemeve, për tokën, motin, shiun që solli baltë mbushi kanalet që duhen pastruar, breshërin që dëmtoi prodhimet e stinës, erën që ngriti çatitë që duhen ndrequr, mundohet të bindi çunat dhe gocat të mos dëgjojnë të marrin Sali Kulla, të mos braktisin vendlindjen, të mos i ftohin vatrat, të mos i ndalin rrahjet e zemrave, të mos i fikin zjarret e shpirtrave.
Sali Kulla, si i dërguar i Djallit për t’i prishur punë Zotit, duke u përpjekur, si e ka zakon, të bëjë punën e gjithkujt me përjashtim të punës së vet, nuk bën punën e askujt, as punën e vet.
Miss Fushata, si misionare e Zotit për tu ndeshur me Djallin, duke bërë vetëm punën e vet, bën punën e gjithkujt.
Meqënse Miss Fushata fluturon kaq lart, plakarruqet, shëmtaraqet, shtrembalaqet, s’mund të rrinë gojëkyçur. Djalli para ato pas, se lënë pa e nxjerrë vjellin vrerin e vet. Por Miss Fushata, me gjithë ndjeshmërinë dhe mëshirën që e karakerizon, nuk mund të shërojë vuajtje që nuk i ngushëllon dot e pamëshirshmja pasqyra.
Kështu ndodh që nga zgjedhja në zgjedhje Sali Kulla votat e partisë së vet i pakson. Ndërsa Miss Fushata votat e partisë së saj i shton.
Kjo është arsyeja pse Sali Kulla gjithmonë humb, ndërsa ajo që gjithmonë fiton është Elisa Spiropali, Miss Fushata.