FIFA pezullon Blater dhe Platini për 90 ditë

Vala e gjatë e “tërmetit” të shkaktuar nga hetimet për korrupsion në radhët e FIFA­-s, të ndërmarra si nga Prokuroria zvicerane, ashtu edhe nga ajo amerikane, ka bërë që këtë të enjte, 3 nga figurat më të shquara të organizmit më të lartë të futbollit botëror të pezullohen. Ka qenë vetë FIFA që ka pezulluar Presidentin e saj në largim, Sepp Blatter; Sekretarin e Përgjithshëm Jerome Valcke, si dhe zëvendëspresidentin – njëkohësisht edhe President të UEFA­s, Michel Platini për një periudhë 90­ ditore. Ish­zëvendëspresidenti Chung Mong­joon është përjashtuar për 6 vite, si dhe është gjobitur me 100 mijë franga zvicerane. Ndëshkimet e fundit janë dhënë nga Komiteti i Etikës së organit më të lartë drejtues të futbollit botëror. Blatter, Valcke dhe Platini janë duke u hetuar nga ky komitet mbi akuzat për korrupsion ndaj tyre. “Bazat për këtë vendim janë hetimet që po zhvillohen ndaj tyre, prej hetuesve ndërkombëtarë por edhe nga Komiteti i Etikës”, thuhet në një deklaratë të FIFA-­s. Të tre ata janë përjashtuar gjithashtu nga të gjitha aktivitetet futbollistike gjatë kësaj periudhe, edhe pse ata mohojnë të kenë kryer ndonjë shkelje.