“Lufta e ardhshme botërore do të jetë lufta për një punë të mirë”

Intervista/ Jim Clifton, drejtor i Qendrës Gallup, flet për sondazhin botëror për punën. Shkalla reale e papunësisë në botë, 50 për qind.

Çdo njeri në botë dëshiron një punë të mirë. Ky mund të jetë përkufizimi i nxjerrë nga një punë 10-vjeçare e “Gallup”, në një botë ku papunësia kap shifrën 50 për qind në nivel real. Jim Clifton, drejtor i Qendrës Gallup, ka botuar librin e tij të fundit, të titulluar “Lufta e ardhshme për punën”, duke aluduar se ajo që do të përjetojë bota në dekadat e ardhshme është lufta për një punë të mirë.

Duke folur për mediat, Clifton sqaroi arsyet që e kishin çuar atë në këtë përfundim. “Ajo që të gjithë në botë dëshirojnë është një punë e mirë. Kjo është një nga zbulimet më të mëdha të ‘Gallup’ të bëra ndonjëherë, por pothuajse asnjë lider në botë nuk e di këtë. Ky është një ndryshim sociologjik i një rëndësie të madhe. Njerëzit duan një punë të mirë; ata nuk duan punë joformale ose vetëpunësimin nga nevoja”. Duke iu referuar të dhënave të qendrës së tij, ai thotë se nga 7 miliardë njerëz në botë, ka 5 miliardë të rritur të moshës 15 vjeç e lart. Sipas “Gallup”, nga këta 5 miliardë, 3 miliardë pranojnë se ata dëshirojnë një punë me kohë të plotë. Vetëm 1.2 miliard në fakt kanë një punë të mirë, që do të thotë se shkalla reale e papunësisë në botë është mbi 50%.

I pyetur se çfarë e bënte atë të besonte se ky fenomen është global, Clifton tha se “ky zbulim vjen nga sondazhi në shkallë botërore i realizuar nga “Gallup”. “Ne kemi ndërtuar korniza të qëndrueshme të mostrave në më shumë se 160 vende, të cilat përfshijnë më tepër se 99% të popullsisë së botës. “Sondazhi botëror” i realizuar nga ne ka gjurmuar vullnetin e botës për 10 vjet”, – shprehet ai.

Kush do të fitojë “luftën e punës” nëse ajo shpërthen sot?

Askush nuk fiton. Lufta për punë manifestohet përmes paqëndrueshmërisë kombëtare. Lufta e punës duket shumë si ajo që ju patë me Pranverën Arabe, e cila është bërë ankthi arab, apo edhe arabe e punës.

Cili është përkufizimi i një pune të mirë?

Gallup e përcakton një punë të mirë si një punë ku punon 30 orë pune në javë me një pagesë të qëndrueshme nga një punëdhënës. Një punë e shkëlqyer është një punë në të cilën ju besoni se shefi juaj kujdeset për zhvillimin tuaj, ju mund të përdorni aftësitë tuaja çdo ditë në punë, dhe ju besoni se puna juaj kontribuon për diçka të mirë.

Si mundet që individët të përgatiten për një luftë të mundshme për punën?

Bota është duke përjetuar një rënie të sipërmarrjes së lirë dhe një ngadalësim të sipërmarrjes. Çdo udhëheqës i çdo vendi dhe çdo qytetar duhet të marrin në konsideratë se si ai ose ajo mund të kontribuojë në ndërtimin e ndërmarrjeve të reja, veçanërisht në krijimin e organizatave të reja startup.

Ju thoni se lufta e ardhshme për punën është për të gjithë liderët. Kush janë këta liderë? Çfarë duhet të bëjnë udhëheqësit? Cili është roli i tyre?

Lidershipi i një qyteti nuk do të thotë vetëm udhëheqësit e zgjedhur, por udhëheqësit lokalë të biznesit, filantropët dhe njerëzit të cilët kujdesen thellë për të ardhmen e qytetit të tyre, është shumë më i rëndësishëm se udhëheqja kombëtare. “Lufta e Punës” po luftohet në nivel të qytetit përreth botës: San Francisco kundrejt Seul, Berlin kundrejt Pekinit. Kjo është kryesisht për shkak se qytetet, ashtu si kompanitë, shfaqin ndryshim të gjerë në rezultatet ekonomike.

Çfarë duhet të bëjnë qeveritë lokale për të promovuar sipërmarrjen?

Qeveritë lokale mund të ndihmojnë duke ulur barrierat për kompanitë për fillimin dhe bërjen e qyteteve të tyre sa më shumë tërheqëse të jetë e mundur për sipërmarrësit. Ju duhet të dëshironi që qyteti juaj të jetë vendi më i mirë në tokë ku mund të nisë dhe të rritet një biznes.

Si mund ta lehtësojë sipërmarrjen?

Aktiviteti më i rëndësishëm është identifikimi i hershëm dhe zhvillim pastaj i qëllimshëm i sipërmarrësve të talentuar, duke përfshirë këshillimin dhe edukimin e mirë në shkencën e konsumatorëve. Qytetet duhet të identifikojnë dhe të zhvillojnë talentet e tyre sipërmarrëse.