“Marrëzitë apokaliptike të Metës” dhe kllouni që zgërdhihet mbi rrënoja

Tërmeti i 26 nëntorit nuk ishte një test për shëndetin mendor të Ilir Metës ashtu sikurse na u paraqit për muaj me radhë, por prova se rilindja e shtetit, jo vetëm ka dështuar, por gjithçka është në pikën më të errët. Si provë për këtë mund të merret paralajmërimi që kreu i shtetit i bëri kryeministrit dhe institucioneve të tjera, për të parë gadishmërinë e vendit për të përballuar fatkeqësitë natyrore.

Por çfarë ndodhi me ngritjen e këtij shqetësimi? Ashtu si çdo problem të madh, Rama e pa me syrin e një kllouni. Meqë ishe koha e sherrit për dekretimin e zgjedhjeve të 30 qershorit ai tha në një intervistë: “Meta e ka kollaj, nxjerr një dekret dhe e anullon tërmetin”. Në disa fjalime me radhë ai e trajtoi presidentin si një të luajtur mendsh, ashtu sikurse ia donte politika e ditës. Edhe me larg shkoi si gjithmonë Elisa Spiropali. Qesharake në kopjimet pa fantazi, sikurse di të jetë vetëm ajo, edhe Mamica e Skënderbeut iu lut baba Xhikes ta shtynte tërmetin me dekret (faksimile e statusit të saj poshtë).

Pas nuk mbetën edhe kori i mediave pro qeveritare që shfrytëzuan një rast për t’u tallur me njeriun që po i krijonte shqetësime Ramës.

Pra i gjithë debati publik u zhvendos në hullinë “është çmendur apo jo Ilir Meta”; “A është marrëzi të parashikosh tërmetet”; sikur halli më i madh të qe, nëse rilindja na kishte dhuruar me votat e saj, një president normal apo një të sëmurë mendërisht.

Por po ta lexosh sot pas në kohë, letra e presidentit nuk e ka fokusin as tek mbiemri apokaliptik as tek gjenialiteti për të parashikuar dridhjet sizmike të tokës. Ajo i kërkon qeverisë një gjë të thjeshtë: “A keni marrë masa për të përballuar fatkeqësitë natyrore?”. Ose sikurse thuhet shprehimisht në letër: “Cilat janë kapacitetet tona për përballimin dhe masat e marra nga ana juaj, nëse vendi ynë do të goditet nga një tërmet i përmasave të tilla? Çfarë masash janë marrë apo do të merren për të reaguar në kohë dhe për të minimizuar pasojat e mundshme në nivel qëndron dhe vendor? Nëse e gjykoni të domosdoshme, jam i gatshëm të mbledh Këshillin e Sigurisë Kombëtare menjëherë qoftë dhe vetëm për këtë çështje, pasi çdo nënvlerësim i situatës mund të jetë me pasoja tragjike për jetën e qytetarëve në radhë të parë”.

Madje presidenti këmbënguli tek kjo pjesë e mesazhit të tij edhe kur u pyet nga ato media që e kishin tallur për çmendurinë e tij (video poshtë).

Ashtu sikurse rezultoi në 26 nëntor, shteti i kllounit që jepte shfaqje në parlament për sëmundjen mendore të Metës, nuk kishte arritur të merrte asnjë masë. As njerëzit nuk ishin nxjerrë nga godinat që ishin krisur nga tërmeti i parë, edhe rezervat e shtetit ishin bosh sa arritëm në pikën që NATO-s t’i kërkonim çarçafë dhe jastëkë, edhe qentë që zbulojnë njerëzit në rrënoja i morëm borxh nga Kosova.

Në ditën e parë forcat tona të shpëtimit gërmonin me duar mbi gërmadha dhe ato nuk kishin asnjë pajisje për ditë të vështira. Si për ironi të fatit edhe qendrës sizmiologjike të Durrësit i ikën dritat, nuk kishte as gjenerator dhe nuk e regjistroi dot përmasën e fatkeqësisë.

Ky është shteti i rilindasve, të cilët kanë vetëm një meritë, që edhe kur të lënë të vdesësh, përpiqen të të bëjnë për të qeshur. Ashtu siç vepruan me talljen e Metës për tërmetin apokaliptik duke anashkaluar fare problemin real që ngrinte ai.

Prandaj sot pas fatkeqësisë ne këmi mësuar një gjë: Jo është apo s’është Ilir Meta me shëndet normal mendor, as nëse ka ai ndonjë dhunti hyjnore për të parashikuar atë që nuk e bën dot as shkenca, por se drejtohemi nga një tufë sharlatanësh karagjozë, të cilët e vetmja gjë që dinë të bëjnë është të zgërdhihen mbi rrënoja.

©Lapsi.al