Përse Basha u mendua gjatë për hetimin ndërkombëtar?

Nga Mero Baze

Kryetari i Partisë Demokratike Lulzim Basha, iu bashkua kërkesës së Berishës dhe Metës për një hetim ndërkombëtar rreth çështjes së ÇEZ-it. Basha foli kështu i treti në radhë, pas propozimit që bëri i akuzuari kryesor për privatizimin dhe falimentimin e ÇEZ-it, ish kryeministri Sali Berisha. Pas Berishës, Meta mbështeti hetimin ndërkombëtar duke shtuar prioritetet e tij për një hetim nga SHBA, meqë ÇEZ është një kompani çeke dhe mund të ketë konflikte interesi në Evropë.

Këtu lindi pikërisht një debat i ri dhe origjinal. Në mungesë të një qëndrimi nga Partia Socialiste, e cila po e soditë gjithë këtë debat, pyetja shtrohej a ka Meta-Berisha një shumicë të re në Kuvend?

Lulzim Basha nuk iu përgjigj për 24 orë kësaj dileme.

Fakti që Berisha kërkoi hetim ndërkomëbtar pa e pyetur atë dhe fakti që Meta i nxorri bllof duke iu bashkuar thirrjes së Berishës, e vendosën Bashën në një pozitë të vështirë, ku duhet të verifikohej shumica e tij në PD apo ajo e Berishës. Ky ishte rasti i parë që publiku mund të shikonte me kë ishte Grupi Parlamentar i PD-së, me Berishën apo Bashën.

Pas 24 orësh Basha i dha fund hezitimit të tij dhe shmangu testin dhe përballjen me Berishën në Kuvend, duke i thënë Metës se ishte dakord me hetimin ndërkombëtar. Këtë e bëri edhe pasi ambasada e SHBA-së e bëri të qartë se qeveria e SHBA-ve nuk do të investohet në një hetim të saj për ÇEZ-in në Shqipëri, duke arsyetuar se Shqipëria ka institucionet e veta. Basha, edhe pse është njeri me lidhje të forta me ambasadorin Lu, i cili ende beson së paku se Basha do t’i japë votat për Reformën në Drejtësi, nuk duroi dot sot sprovën në të cilën e vendosi papritur dyshja Berisha-Meta dhe shmangu përballjen me Berishën në PD dhe zgjodhi si më të lehtë përballjen me “Jo-në” e SHBA-së, pasi ata shpreson t’i sqarojë kokë më kokë në zyrë, me justifikimin e tij të zakonshëm “s’kam çcfarë t’i bëj Berishës”, siç u thotë gjithë të huajve.

Në të vërtetë të gjithë aktorët e nisën dhe përfunduan kërkesën për hetim ndërkombëtar për arsye të ndryshme. Berisha e nisi si bllof. E para për t’i shpëtuar një hetimi në Shqipëri dhe e dyta me shpresë se do të kompleksonte Ilir Metën dhe ky do të thoshte “Jo”. Meta tha “Po” duke e shtrirë deri në SHBA, jo vetëm për t’i krijuar Bashës kompleksin se po bashkëpunon me Ramën kundër Berishës, por dhe për tu treguar i qetë që nuk ka probleme nga kjo histori. Basha, i cili mbajti frymën pezull 24 orë, i tha po hetimit ndërkombëtar, pasi u sigurua nga SHBA dhe ndoshta nga ndonjë ambasador i BE-së që nuk do pranohet dhe për të shmangur ballafaqimin mes tij dhe Berishës brenda grupit të PD-së.

Pra siç shihet, arsyet që çojnë tek hetimi ndërkombëtar janë në të vërtetë arsyet dhe përse nisi kjo zhurmë, e cila nuk është një betejë anti-korrupsioni, por një skemë diversioni, e cila nisi kundër dyshes Rama-Meta dhe po përfundon tek dyshja Basha-Berisha.

 TEMA