Pjerin Ndreu: Zjarret dhe Paketa e Maleve, alibia e shëmtuar që serviret në publik!

Në një reagim të ashpër në rrjetet sociale, Kryetari i Bashkisë së Lezhës, Pjerin Ndreu, hedh poshtë kategorikisht pretendimet se zjarret në pyje po shkaktohen me qëllim për t’u shfrytëzuar nga “Paketa e Maleve”. Ndreu e cilëson këtë një “alibi të shëmtuar” dhe absurditet të përhapur nga komentuesit online, ndërsa vë në dukje punën e përditshme dhe sakrificën e zjarrfikësve, ushtrisë, emergjencave civile dhe vullnetarëve në terren.

Pjerin Ndreu

Që e keqja ka marrë përmasa dhe gatuhet pa pikë turpi në shumë llogari në rrjetet sociale apo nga të pakënaqurit e përjetshëm, kjo dihet.
Por, në këtë gjurulldi komentesh e trajtimesh, më të habitshmet janë ato për zjarrvënie për shkak të Paketës së Maleve. Mund të shkruash çfarë të duash, por të lëshosh mufka të këtij lloji është skandaloze. D.m.th., i djegim ne malet se duam t’ua shesim oligarkëve?!
Vetëm në Lezhë, për të paditurit kronikë, menaxhohen çdo ditë 10–20 vatra zjarri. Zjarrfikësit shkojnë në fushë e në mal, ditën dhe natën, dhe përballen me situata të ndryshme, duke i vënë ato nën kontroll.
Po tek të gjitha bashkitë bashkë?! Sa vatra vihen nën kontroll pa i lënë të agravojnë?! Me qindra. Po në një muaj? Po në dy-tre muaj?
Atëherë, si i bie, e mbron shteti këtë situatë, apo kanë të drejtë chatistët e helmit, që bëjnë lidhje të pakuptimta vetëm për të shfryrë vrerin që kanë në trup?!
Por, nëse shteti do t’i linte pa kujdes këto raste apo, më keq akoma, do t’i vinte vetë zjarret, e dini se çfarë do të kishte ndodhur në këtë vend?!
Apo nga shtëpia e lokali, me gotën e rakisë përpara, interpretohen më mirë aktet e pafundme të shuarjes së zjarreve, pa ju dalë as tymi?!
Si mund të bëhen lidhje të tilla absurde, ditën për diell, kur zjarrfikësit, ushtria, emergjencat civile, policia dhe qytetarët vullnetarë janë bashkë në shuarjen e zjarreve, ndërsa helmuesit merren me ndezjen e argumenteve më të paqena?!