Putin: Të luftojmë ISIS njësoj si Hitlerin

Presidenti i Rusisë Vladimir Putin ka bërë thirrje për krijimin e një organizate të përgjithshme për të luftuar Shtetin Islamik njësoj si aleanca që u krijua kundër ish-diktatorit nazist Adolf Hitler. Deklarata e Putin u bë në mbledhjen e 70-të të Asamblesë së Përgjithshme të Organizatës së Kombeve të Bashkuara në Nju Jork ku morën pjesë liderë të shteteve nga e gjithë bota.

Sipas Putinit, organizata e përgjithshme që do të krijohet, do të shërbejë për të rivendosur stabilitetin në Lindjen e Mesme, pasi shumë në shtete mungesa e qeverisë është zëvendësuar nga ekstremistët, tha Presidenti rus.

“Të krijohet një organizatë e përgjithshme kundër ISIS që të bazohet në Kartën e OKB-së për të rivendosur stabilitetin në Lindjen e Mesme. Forca e Kombeve të Bashkuara është që të sjellë së bashku vizione të ndryshme të gjërave. OKB sot kritikohet shumë për shkak të një mungese efikasiteti. Nuk duhet të harrojmë gabimet e të tjerëve, përndryshe do t’i përsërisim. Ka një numër të madh të vendeve në Lindjen e Mesme që mungesa e pushtetit plotësohet nga ekstremistët”, u shpreh Putin.

Kreu i Kremlinit doli kundër Presidentit të SHBA Barack Obama për qeverinë e Presidentit Bashar Al-Assad në Siri. Gjatë fjalës së tij në OKB, Obama tha se Assad ka bërë krime kundër popullit të tij. Kurse Putin doli në krah të Bashar Al-Assad, duke u shprehur se është gabim mosbashkëpunimi me qeverinë siriane.

“Është një gabim i madh që të mos bashkëpunosh me qeverinë siriane. Hipokrizia nuk mund të luftojë terrorizmin ndërkombëtar. Duhet të respektojmë ligjin ndërkombëtar, të gjitha përpjekjet që do të bëjmë duhet të gjejnë mbështetje”, deklaroi Putin.

Presidenti i Rusisë doli shtoi se lufta e militantët të ISIS në Siri dhe Irak nuk ka lidhje me besimin fetar të Islamit.

“Ideologjia e militantëve të ISIS nuk ka të bëjë me islamin dhe vlerat e saj humanitare.Shumë militantë të ISIS janë ish-oficerë të Irakut. Shteti Islamik është i rrezikshëm”, deklaroi Presidenti rus gjatë fjalës së tij në OKB.