Rama: Nderim ambasadorit të parë në Selinë e Shenjtë, Z. Vili Kamsi
Nga Edi Rama.
AMARCORD
Në 25 vjetorin e vendosjes së marrëdhënieve diplomatike mes Selisë së Shenjtë dhe Shqipërisë dhe në muajin e 90 vjetorit të tij të lindjes, një mirënjohje e veçantë kombëtare meriton t’i shprehet personalitetit sa poliedrik aq edhe diskret shkodran, ambasadorit të parë në Selinë e Shenjtë, Z. Vili Kamsi, i cili në këtë foto shfaqet duke i dorëzuar letrat kredenciale Papës Gjon-Palit II. Në fund të mandatit të tij, 20 vjet më parë, në dhjetor 1996, Sekretaria e Shtetit do të dekorojë me kryqin e madh të Urdhërit të Shën Gregorit të Madh.
Pinjoll i familjes ndoshta më të vjetër patrice të dokumentuar shkodrane, që aq shumë prelatë, patriotë e studiues i dha Shqipërisë, Kishës dhe letrave shqiptare, që farëzoi fisnikë deri në ujdhesat joniane dhe Rusi, Vili Kamsi, djalë i atdhetarit Gjon i Palok Kamsit, të përjetësuar në një foto të hirshme të Marubit, vazhdon ende të hulumtojë me sukses në fushën e gjuhësisë dhe historisë.
Faleminderit për çka ka bërë për Shqipërinë këtij diplomati dhe njeriu të dashuruar pas dijes!
