“Ringjallet” Faik Konica: Politika thotë se gomari fluturon…ne e besojmë

Zgjedhjet lokale vendosin sot fatin e 61 bashkive në vend dhe njerëzve që do t’i qeverisin ato në katër vitet e ardhshme.  Janë bërë premtime të shumta elektorale. Që në vitet e para,  kur Shqipëria është krijuar si shtet, duket se ka pasur probleme me premtimet boshe të politikanëve, dhe popullin e painformuar, teksa njeriu i letrave Faik Konica i ka kushtuar edhe një vëmendje, duke thumbuar politikanët e kohës. Duket se prej asaj kohe, e njëjta sindromë shoqëron politikën shqiptare.       

Faik Konica

Ajo që na shquan neve është se pësimet nuk na bëhen mësime. E harrojmë të shkuarën me një frazë të ndyrë “ç’i gris t’ëmën”, dhe biem prapë në grackat e para. Me këtë mentalitet do mos mundim kurrë të bëjmë një shtet serioz. Sa kohë që ne besojmë edhe kur na thonë se fluturon gomari, le të mos presim ngritjen tonë sociale dhe politike. Se ç’pret prej një populli që sheh me syt’ e tij vrasje, vjedhje, grabitje e të këqija të tjera dhe duartroket qeverinë kur i thotë ajo që ka qetësi të plotë!

Ndofta kombi ynë do kish sot një faqe tjetër, fare të ndryshme nga e sotmja, po të qe populli pak më serioz dhe t’i gërmonte punët pak më thellë e me më tepër gjykim. Mjerisht, ne Shqiptarët jemi njerëz superficialë, njërës që shohim vetëm cipën dhe nuk çajmë kokën të hyjmë në të thellat. Mjafton për ne që të na thonë se kemi qetësi, pa se vriten njërës dita me ditë (e në mes të ditës), se bëhen vjedhje, se grabitet mall e gjë toptan, se rrëmbehen gra e bëhen qindra turpe të tjera, a që na bën. “Zyra e shtypit” nxjerr një prokllamatë: “që qetësia mbretëron kudo”; kjo është mjaft të na qetësojë dhe të na kandisë se me të vërtet populli gëzon qetësinë. Dhe me këtë ide në trutë tona habitemi e shkumbëzohemi kur dëgjojmë një tjetër të na thotë se vrasjet e vjedhjet po e turpërojnë zullumin në Shqipëri, e themi: “Ç’thotë ky sharlatan? Nuk ka sy të shohë dhe tru të gjykojë?” Po kur nuk jemi gënjyer që të mos gënjehemi edhe sot? Kurdoherë, në çdo kohë e në çdo rast, Shqiptari është gënjyer aq prej vëllezërve të tij sa edhe prej të huajve. Neve dhe arsye më e vogël na kandis e na mbush mendjen, dhe aqë, sa vetëm batërdia dhe prishja na ka sjellë ndër vete. Po kur na vijnë mëntë nuk i hanë as qentë! Pendohemi dhe i biem kokës kur zogu ka shpëtuar nga duart tona. Po nuk është vetëm kjo e keqe që na prish ne Shqiptarëve. Edhe kombet e tjerë janë gënjyer e gënjehen. Ajo që na shquan neve është se pësimet nuk na bëhen mësime. E harrojmë të shkuarën me një frazë të ndyrë “ç’i gris t’ëmën”, dhe biem prapë në grackat e para. Me këtë mentalitet do mos mundim kurrë të bëjmë një shtet serioz. Sa kohë që ne besojmë edhe kur na thonë se fluturon gomari, le të mos presim ngritjen tonë sociale dhe politike. Se ç’pret prej një populli që sheh me syt’ e tij vrasje, vjedhje, grabitje e të këqija të tjera dhe duartroket qeverinë kur i thotë ajo që ka qetësi të plotë! Ka keq edhe më keq dhe vendi ynë ka parë ditë më të errëta se të sotmet, po të paktën, le të mos mburremi; dhe le të mos qortojmë e të shajmë ata që përpiqen për një qetësi të vërtetë, për një qetësi të dalë nga shpirti dhe dëshira dhe jo të shkaktuar prej drurit dhe prej burgut. Na thonë, se qetësia mbretëron në Shqipëri; e besojmë. Na thonë, se për tre javë do ndodhet eksperti i financave në Shqipëri, gëzohemi. Na thonë, se qeveria do blerë dhjetë aeroplanë dhe japim me duart plot. Na thonë, se për pak kohë Shqipëria do të bëhet oksidentale, duartrokisnim. Na thonë, se qeveria e shpëtoj shtetin nga një rrezik i madh, thërrasim me tërë fuqinë: “rroftë qeveria kombëtare!” Na thonë se fluturoi gomari… ne e besojmë!