Shperthimi i Erjon Braces: S’dua te degjoj traplliqe pa fund

Nënkryetari i grupit parlamentar socialist, Erion Braçe ka shprehur një sërë rezervash gjatë seancës së djeshme, si për angazhimin e qeverisë në seancë, ashtu edhe për mënyrën e drejtimit të saj.

Fillimisht Braçe ka shprehur kritika për mungesën e ministrave në sallë gjatë kohës që në të diskutoheshin një sërë marrëveshjesh të rëndësishme.

Më pas ai është revoltuar me mënyrën sesi drejtuesit e seancës po menaxhonin diskutimet, duke lënë deputetët e opozitës që të flisnin për çështje që s’kishin lidhje me rendin e ditës. Ndërsa seancën e drejtonte nënkryetarja Valentina Leskaj, ai ka kërkuar fjalën për procedurë, duke shprehur revoltën e tij për anashkalimin e rendit të ditës.

“Nuk dua të dëgjoj trapllëqe pa hesap nga mëngjesi deri në darkë. Nuk dua të dëgjoj gjëra për të cilat s’më plas fare, nëse do i përmbaheni rendit, mirë, nëse jo, më mirë po shkoj në shtëpi”, – tha Braçe.

Deputeti socialist e ka marrë fjalën pas kolegut të opozitës, Genc Pollo, i cili foli për ligjin e Arsimit të Lartë dhe çështjen shpërndarjes së frekuencave, që nuk ishin në rendin e ditës.