Të të lësh ministrat në derë

Nga Mero Baze

Aleati kryesor i Partisë Socialiste, Ilir Meta, ka bërë një kërkesë publike për ndryshime në qeveri, duke e konsideruar se enegjitë e konsumuara nga betejat e fundit, mund të kenë nevojë për impulse të reja. Kërkesa është bërë publike, pasi janë qetësuar disi gjakrat mes tij dhe kryeministrit Rama në debatin për çështjen e CEZ.

Kërkesa publike e Metës, ka disa nuance të pazakonta politike.

Nuanca e parë e kësaj kërkese, është se Meta, kur bën fjalë për ndryshime në qeveri, ka parasysh ministrat socialistë, pasi nëse do të bënte fjalë për ministrat e vet, ai do të bënte propozime konkete për kryeministrin Rama. Duke theksuar se ndryshimet janë në dorë të zotit Rama, Meta është duke i kërkuar të ndryshojë disa ministra socialistë “për t’i dhënë impulse të reja” qeverisjes.

Ndryshe nga çka ndodhur në qeverisjen Berisha- Meta, kur Meta ndryshoi brenda ditës ministrat e vet, pa u konsultuar me Berishën, por duke marrë një vendim politik, këtë radhë Meta po sugjeron ndryshime, duke konsideruar se karroca e pushtetit ka probleme nga krahu i socialistëve.

Nuanca e dytë e kërkesës së Metës është se ai e ka inkuadruar kërkesën e tij në fund të konsumimit të një debati të lodhshëm publik, që më shumë e mjegulloi se e sqaroi çështjen CEZ, dhe ku ai e pa vetën disa herë të vetmuar dhe nga socialistët. Në këtë pikë, ai e shikon nevojën e ndryshimeve në qeveri, edhe si një shenjë besimi dhe kompesimi për të ecur bashkë pa probleme përpara.

Së treti, Meta po e bën kërkesën publikisht, jo se e ka të vështirë t’ia thotë përballë Ramës, por se dëshiron të mos marrrë kosto për një sërë problemesh në qeverisje, sidomos në financa, shëndetësi dhe natyrisht në energjitikë, Ministri, e cila i prodhoi dhe debatin politik rreth CEZ. Duke mbajtur një qëndrim publik për ndryshime, Meta kërkon t’u thotë socialistëve, se nuk është gati të marrë kostot e problemeve që krijojnë ministrat socialistë.

Kërkesat e tij publike, më shumë se sa ndonjë objektiv konkret, janë një përpjekje për të ndarë përgjegjësitë para publikut dhe për t’u thënë shqiptarëve, se ai është i gatshëm të reflektojë për keq-qeverisjen, ndërsa ai që e mbron atë është kryeministri. Dhe e vërteta është, se ideja e ndryshimeve në qeveri, ka një pritshmëri shumë më të madhe nga publiku, se heroizmi i Edi Ramës për të mos i prekur asnjë qime floku ministrave, duke i shpallur ata monumente që ruhen nga kryeministri, edhe kur janë me probleme. Në këtë pikë Meta është më afër pritshmërisë së publikut, bile dhe socialistëve, se sa është Edi Rama, i cili nuk ka pse “bën be” për kokë të ministrave.

Thelbi i kësaj beteje publike të Ilir Metës nuk është ndonjë emër i përveçëm, edhe pse disa të tillë i ka nën gjuhë. Thelbi është që ai do të ndajë llogaritë, për problemet e keq-qeverisjes publikisht. Ai më shumë se kërkon t’ia nxjerrë nga dera disa ministra, kërkon t’ia lërë ata në derë Edi Ramës.

TEMA