Giusy Ferreri: E lumtur të këndoj në Tiranë

Është hera e dytë që vini në Tiranë
Jam shumë e kënaqur që rikthehem në Tiranë. Jam gjendur shumë, shumë mirë në 2009-ën. Ishte pikërisht koha kur prezantoja këngën “Novembre” dhe të rikthehesh është një emocion shumë i bukur, të ndjesh këtë afeksion, ngrohtësi dhe mikpritje.

dhe vjen në nëntor
E.. sigurisht. Pikërisht në nëntor.

E dinit që publiku shqiptar i këndon këngët tuaja?
Jam shumë e lumtur për këtë. Mbaj mend që kur isha në vitin 2009 ishte surprizë për mua të shihja publikun të këndonte këngët e mia në italisht. Ishte një emocion i madh.

Çfarë do të këndoni për ne sonte në mbrëmje?
Do të këndoj sukseset e mia, këngët që më kanë shoqëruar gjatë rrugëtimit e që praktikisht bëjnë pjesë në 5 albumet e mia.

Kënga e parë që ju publikuat në vitin 2005 nuk pati shumë sukses apo jo?
Po. Është e vërtetë. Ishte një këngë e shkruar prej meje me një mesazh paqeje, dashurie dhe vëllazërie, që e ndiej shumë aktual edhe sot. Në atë kohë u paraqita në shumë shtëpi diskografike, pasi doja të ecja para në muzikë, por ishte shumë e vështirë. Le të themi që fati ishte me mua, pasi në Itali u zhvillua “X Factor”, ku unë mora pjesë dhe u zgjidh edhe situata ime. Isha me fat.

Prekët pastaj majat e klasifikimeve me “Non ti scordar mai di me”. Çfarë ndien teksa renditesh në krye?
Ndihem e ngazëllyer, sepse është një përgjigje pozitive nga ana e publikut, nga ata që këndojnë me ty dhe e duan që bashkë me ty të transmetojnë mesazhe përmes muzikës. Kjo është gjëja më e bukur që mund të ndodhë, pasi arrin të depërtosh tek shumë njerëz.

Para se të bëheshit këngëtare, keni punuar si shitëse…
Po, për 10 vite, gjatë të cilave gjithnjë kam tentuar të hyj në botën e muzikës. Kam punuar “part-time” si kasiere në një supermarket. Padyshim që ishte një eksperiencë që më ka dhënë shumë. Sot kuptoj edhe më shumë vlerën e asaj që bëj. Ndonjëherë është shumë e vështirë, pasi duhet të udhëtosh shumë dhe jo gjithnjë je në formë, por në fund kupton se ke qenë me shumë fat. Të gjithë profesionet kërkojnë sakrificë, por të rrish në fund të bësh atë që ke dëshiruar gjithnjë, duhet ta konsiderosh veten me fat.

Duhet besuar tek ëndrrat?
Duhet të besojmë shumë tek ëndrrat.

Ju bëni edhe bamirësi…
Po, absolutisht, sepse është e rëndësishme të dish që je e bekuar. Është një mundësi për t’u afruar edhe më shumë me njerëzit dhe padyshim që rastet e bamirësisë shërbejnë për të dhënë mesazhe. Është një mënyrë për të treguar mirënjohje ndaj dhuratës që të është bërë.

Projektet e ardhshme?
Po punoj për një album të ri. Sapo kam përfunduar turin dhe brenda dy javësh do të nisim të punojmë mbi albumin e ri që në muajt e parë të vitit, të jetë gati albumi i ri, aq shume i dëshiruar. – TCH.