Investigimi i BOOM: Në spitalin e Pukës s’i druhen gripit, por terrorizmit

Situatë problematike dhe në spitalin e Pukës ku marrin shërbimin mjekësor rreth 25 mijë banorë.

Grupi i xhirimit të emisionit “BOOM” teksa tenton të futet brenda përballet me rezistencën e rojes, që nuk i lejon të kalojnë portën.

Roja i spitalit: Drejtori nuk është këtu, brenda derës jo, më kanë dhënë urdhër.

Operatori i BOOM: A më the mua ik tek Drejtori?

Roja i spitalit: Po mirë, ik tek Drejtori.

Operatori i BOOM: Unë vete deri lart tek Drejtori, Drejtori nuk është.

Roja i spitalit: Pa lejen e Drejtorin unë nuk mundem, ti do me më heq prej pune? Mua më prishni punë o vëlla, vetëm me lënë vendin e punës.Nuk mundem për sy të ballit me ju lënë.

Por pse media nuk lejohet të xhirojë brenda këtyre ambjenteve? Ndoshta këto pamje të filmuara nga ‘BOOM” janë një arsye.

https://www.facebook.com/Ora.News.RTV/videos/677802585678200/

Ndërsa një arsye tjetër është dhe një urdhër i posaçëm i Drejtorit të spitalit i afishuar në derë.

“Urdhër i Brendshëm për marrjen e masave, forcimin, ruajtjen dhe sigurinë kundër akteve terroriste për kujdesin shëndetësor: Të mbyllet me çelës dera e hekurit në hyrje të spitalit. Personeli shëndetësor dhe jo shëndetësor të mos lejojë kamerat të filmojnë në ambientet e spitalit dhe të mos prononcohet për asnjë lloj problemi pa autorizimin e titullarit të institucionit.Ndaj personave përgjegjës do të merren masa administrative”.

Gazetarja e “BOOM” kontaktoi në telefon me drejtorin e spitalit.

Gazetarja: Përshëndetje Drejtor. Jam Alketa, gazetare nga Ora News. Mund të takohemi një moment të lutem.

Drejtori i spitalit, Enver Sulejmani: Jo, unë nuk jam i disponueshëm për momentin.

Gazetarja: Kur vini?

Sulejmani: Nuk e di, jam në një takim pune, nuk jam hiç në Pukë.

Gazetarja: Nuk je në Pukë? Por unë të kam parë para gjysëm ore tek qendra.

Sulejmani: Po më ke parë hajde dhe më gjej ku jam atëherë.

Gazetarja: Nuk lozim kukafshehtësi, të të gjej unë ty ku je.Mund të vish pak tek zyra të flasim? Keni mungesa për mjekët specialistë?

Sulejmani: Po kemi, një kardiolog dhe një okulist.

Gazetarja: Mund të futemi tek spitali “Erzen Selimi” të marrim ca pamje të ambienteve jashtë jo brenda?

Sulejmani: Na kanë urdhër mos me leju me hy brenda pa urdhër të titullarit.

Jashtë kameras personeli rradhit një sërë problematikash duke filluar nga mungesa e mjekëve specialistë, deri tek lagështira që e ka pushtuar të gjithë godinën.

Në fund gazetarja e ‘BOOM’ hodhi letrën me vërejtje në kutinë e ankesave të spitalit.